Madaxweynaha JFS oo caasimadda Talyaaniga ee Roma uga qeybgalayo shirar heer caalami ah

 

Madaxweynaha Jamhuuriyadda Federaalka Soomaaliya Xasan Sheekh Maxamuud iyo wafdi uu hoggaaminayo oo gaaray magaalada Roma ee dalka Talyaaniga.

Madaxaweyne Xasan Sheekh ayaa dalkaas uga qeyb-gaya shirar heer caalami ah iyo kuwo heer gobol ah oo ka dhacaya Roma.

Shirka ugu weyn ee ka qeyb galkiisa uu madaxweynuhu u tegay Talyaaniga waa ‘Madasha Geeska Afrika iyo Talyaaniga’ oo ka furmeysa Roma.

Madaxda dalalka Geeska Afrika oo Soomaaliya ay ka mid tahay ayuu Talyaanigu ku casuumay madashaas.

Sidoo kale Madaxweynaha Soomaaliya wuxuu ka qeyb geli doonaa shir seddax geesood ah oo u dhaxeeya Talyaaniga, Soomaaliya iyo Itoobiya.

Sida ay shaacisay Madaxtooyada Soomaaliya shirarka kale ee Madaxweynuhu uu ka qeyb gali doono waxaa ka mid ah, shirka Qaramada Midoobey oo looga hadli doono la dagaalanka cunto yarida iyo ka hor tagga macaluusha.

Madaxweyne Xasan Sheekh ayaa madaxda caalamka la wadaagi doona cunto yarida ka jirta Soomaaliya iyo caqabadaha sababay.

Sidoo kale Madaxweynaha ayaa shirka Qaramada Midoobey ku soo bandhigi doona warbixin ku saabsan fursadaha balaaran ee dhanka beeraha Soomaaliya, si caalamku u maal-gashado.

 

Read More

Dowladda Mareykanka ayaa ku dhawaaqday in ay qorsheyneyso in ay ku xoojiso isbaheysiga milatari ee ay la leedahay Soomaaliya

 

Safaaradda Mareykanka ee Soomaaliya ayaa shaaca ka qaaday inay qorsheyneyso inay xoojiso isbaheysiga milateri ee ay la leedahay dalalka Afrika oo ay Soomaaliya ku jirto, kadib kulan ay la qaadatay Wasiirka Gaashaandhigga Soomaaliya, C/qaadir Maxamed Nuur iyo Taliyaha Ciidanka Xoogga Dalka Sareeye Guuto Ibraahim Sheekh Mohiuddin.

Inta uu socday kulanka ayaa waxaa looga hadlay sidii loo xoojin lahaa ammaanka dalka Soomaaliya, iyo sidii loo sameyn lahaa saldhigyo cusub oo ay leeyihiin ciidamada gaarka ah ee Soomaaliya ee loo yaqaan “DnB”.

Kulankan ayaa kusoo beegmaya xilli Soomaaliya ay u diyaar garoobayso wajigii labaad ee dagaalka ay kula jirto Xarakadda Al-Shabaab, waxaana la filayaa in Maraykanka uu taageero muhiim ah siiyo ciidamada Soomaaliya gaar ahaan kuwa “Denab” oo uu Mareykanku tababaray.

 Dhowaan ayay aheyd markii Wasiirka Gaashaandhigga Soomaaliya uu kulamo la qaatay mas’uuliyiin ay ka mid yihiin Safiirka UK ee Soomaaliya, Ergeyga Qaramada Midoobay u qaabilsan Soomaaliya, Madaxa Xafiiska Siyaasadda Qaramada Midoobay ee Soomaaliya, Taliyaha Ciidamada Uganda, isagoo kala hadlay sidii loo abaabuli lahaa taageerada caalamiga ah ee la dagaalanka Argagixisada.

 

Read More

Soomaaliya iyo Britain ayaa ka wada hadlay xoojinta dadaallada lagu ciribtirayo khatarta Al-Shabaab

 

Kulan ay magaalada Muqdisho ku yeesheen Wasiirka Gaashaandhigga Xukuumadda Federaalka Soomaaliya Mudane C/qaadir Maxamed Nuur iyo Safiirka Dowladda Ingiriiska u fadhiya Soomaaliya Danjire Mike Nethifrianakis ayaa maanta oo Jimco ah kaga wada hadlay xoojinta dadaallada lagu ciribtirayo khatarta Al-Shabaab.

Wasiirka iyo Safiirka ayaa qiimeyn ku sameeyay horumarka ay ciidamada amniga Soomaaliya ka sameeyeen dadaallada ka dhanka ah argagixisada iyo caqabadaha weli hortaagan in dalka uu ka xoroobo argagixisada.

Danjire Nithfrianakis ayaa ka faa’ideystay fursadda uu ku muujinayo taageerada hagar la’aanta ah ee Dowladda Britain ay siiso dadaallada Soomaaliya ee lagula dagaallamayo argagixisada iyo soo celinta nabadda iyo amniga gobolka.

Wasiir Nour iyo Danjire Nithfrianakis labaduba waxay carrabka ku adkeeyeen muhiimadda ay leedahay in wax laga qabto arrimaha asaasiga ah ee gacan ka geysta xagjirnimada iyo argagixisada.

Waxa ay sidoo kale carrabka ku adkeeyeen muhiimadda ay leedahay hindisayaasha horumarinta dhaqaalaha iyo bulshada ee looga gol leeyahay in lagu helo fursado korriin iyo barwaaqo ah dhammaan qeybaha kala duwan ee bulshada, maadaama hindisayaashan ay lagama maarmaan u yihiin in la yareeyo saameynta fikradaha xagjirnimada iyo horumarinta xasillooni waarta.

Natiijadii ka soo baxday kulanka Muqdisho ayaa hoosta ka xariiqaya iskaashiga istiraatijiyadeed ee xooggan ee ka dhexeeya Soomaaliya iyo UK ee mowqifkooda mideysan ee ka dhanka ah argagixisada iyo dadaallada lagu hagaajinayo amniga gobolka

Read More

Agaasimaha guud ee Wasaaradda Warfaafinta oo soo xiray tababarka kor u qaadista doorka gabdhaha saxafiyiinta

 

Tababarkan oo ay soo qaban qaabisay Wasaaradda Warfaafinta, Dhaqanka iyo dalxiiska Xukuumadda Federaalka Soomaaliya waxaa ka qeyb galay 30 gabdhood oo saxafiyiin ah oo ka hawlgala hay’adaha Warbaahinta gaarka ah iyo ururada saxaafadda, waxaa uuna socday intii u dhaxeysay 18-kii ilaa iyo 20-ka July, 2023.

Ka qeyb galayaasha ayaa qaatay casharro diiradda lagu saaray habka maamulka hay’adaha warbaahinta oo ay bixinayeen macalimiin qibrad u leh, waxaana ay isku weydaarsadeen doodo looga hadlayay caqabadaha iyo fursadaha gabdhaha ee hay’adaha warbaahinta.

Agaasimaha Waaxda Shaqaalaha iyo tababarada Wasaaradda Warfaafinta, Dhaqanka iyo Dalxiiska Soomaaliya Marwo Fartuun Axmed Xasan ayaa sheegtay in u jeedka tababarkan soo idlaaday uu ahaa xoojinta doorka dumarka ee maamulka Warbaahinta.

“ Gabdhaha waa laf dhabarta Warbaahinta, waxaan tababarkan u qabanay in wadaagno muhiimada ay leedahay koru qaadista kaalintooda maamulka, waxaan rabnaa in gabdhaha fursadahooda kor loo qaado sida in ay hay’adaha warbaahinta ka noqdaan agaasin, tifaftir iyo Madax qeybeed, ayay tiri Agaaisme Fartuun.

Agaasimaha guud ee Wasaaradda Warfaafinta, Dhaqanka iyo Dalxiiska Xukuumadda Federaalka Soomaaliya Mudane Cabdullaahi Xayir Ducaalle oo soo xiray tababarka ayaa kula dardaarmay gabdhaha saxafiyiinta ah ee ka faa’iidaystay tababarka in ay dhaqan galiyaan waxyaabihii ay ka faa’iideyn aqoon isweydaarsiga.

Agaasime Xayir ayaa sheegay  in Wasaaradda Warfaafinta, Dhaqanka iyo Dalxiiska ay ka go’an tahay xoojin doonto kobcinta aqoonta iyo xirfadaha saxafiyiinta si gaar gabdhaha oo muhiim u ah.

“Tababarkan waxaan u qabanay in aan kor u qaadno oo muujino kaalinta gabdhaha ee maamulka Warbaahinta, waxaan rajeynayaa ina aad dhaqan galisaan wixii aad ka kororsateen, ka wasaarad ahaan waxaan rabnaa in tababarkan gabdhaha sii wadno waxaan gaarsiin doonaa dhammaan xarumaha dowlad goboleedyada maalmaha iyo todobaadyada soo aaddan, waxaa naga go’an kor u qaadista tababaridda iyo horumarinta  wariyayaasha si guud, si gaar ah gabdhaha oo muhiim u ah”

Ka qeyb galayaasha tababarka oo la guddoonsiiyay shahaadooyin muujinayay tababarka ay qaateen ayaa uga mahad celiyaay wasaaradda qabashada tababarkan oo ay sheegeen in wax badan ay ka kororsadeen  iyo macalimiinta bixiyay casharada aqoon isweydaarsigaan oo ay tilmaameen in ay u hagar baxeen intii uu socday.

 

Read More

Wasiirka Caafimaadka oo hor tagay guddiga horumarinta adeegga bulshada ee Golaha Shacabka

Wasiirka Wasaaradda Caafimaadka Dr; Cali Xaaji Aadam, oo ay wehliyaan Wasiiru Dowllaha Wasaaradda Drs; Maryam Maxamad Xuseen, Wasiir Ku xigeenka Wasaaradda Xildhibaan Dr ;

 Maxamad Xuseen Maxamad ayaa guddiga horumarinta adeegga bulshada ee Golaha Shacabka ayaa Warbixin guud ka siiyay qorsha-howleedka iyo qaab-dhismeed guud ee Wasaaradda Caafimaadka howlaha baaxadda leh ee horyaalla waxyaabihii uqabsoomay iyo halka ay hadda wax u marayaan.

Sidoo kale Wasiirka ayaa sheegay inay wax badan ka qabteen horumarinta daryeelka Caafimaadka dalka iyo tayayntiisa.

Intaa kadib Xubnaha Guddiga ayaa mid mid u Weydiiyay Wasiirka Su’aalo la xariiray Caafimaadka Dalka Mashaariicda hoos yimaadda kuwa socda iyo kuwa la filayo in dhawaan ay  Wasaaraddu daah-furto sida Mashruuca Damal Caafimaad.

Shuruucda hor-tebinta uleh  Wasaaradda oo ay doonayaan inay  usoo gudbiyaan Golaha Shacabka BJFS  sida Sharciga dawada dalka iyo Caqabadaha hor-taagaan inay Wasaaradda keento maadama uu muddo fog soo jiitamayo lagama maarmaana ay tahay inuu dalka yeesho sharci dawo oo la isku halleyn karo.

Hiigsiga iyo himillada fog ee la xariira Caafimàadka guud ee Wasiirka Wasaaradda ayaa ka wada jawaabay guud ahaan su’aalihii ay weydiiyeen xubnaha iyo guddoonka guddiga horumarinta adeegga bulshada ee Golaha Shacabka.

 

Read More

Ra’iisul Wasaaraha oo daah furay Xarunta Keydka Caafimaadka Qaranka

 

Ra’iisul Wasaaraha Xukuumadda Federaalka Soomaaliya mudane Xamsa Cabdi Barre, ayaa xarigga ka jaray Xarunta Dhexe ee Qaranka ee Keydka Daawada Soomaaliya, taas oo daboolaysa baahida ay dadweynaha Soomaaliyeed u qabaan daawo tayo leh oo la hubiyey badqabkeeda.

Ra’iisul Wasaaraha ayaa tilmaamay in hirgelinta xaruntani ay ka tarjumeyso halbeeg muhiim ah oo la xaqiijiyey, loogana gudbaayo dhibaatooyinkii soddonkii sanno ee la soo dhaafay ay dadkeenna ku sababeen daawooyinka bilaa tayada ah ee dalka la keenayay.

Ra’iisul Wasaare Xamsa oo u mahadceliyey dhammaan dhinacyadii ka qeyb qaatay hirgelinta xaruntani, isagoo faray Wasaaradda Caafimaadka iyo Daryeelka Bulshada in si hufan looga faa’deysto xaruntan, isla markaana laga hirgeliyo xarumo lamid ah dowlad goboleedyada dalka.

Sidoo kale, Mudane Xamsa Cabdi Barre, ayaa ugu baaqay shacabka Soomaaliyeed ee dagan xarumaha danta guud ee ay leedahay Dowladdu, gaar ahaan kuwa Wasaaradda Caafimaadka in ay banneeyaan, si loogu adeego bulshada Soomaaliyeed.

Read More

Howl wadheenka Midowga Yurub ee Soomaaliya ayaa soo dhaweeyay shirkii wadatashiga ee dhawaan ka dhacay magaalada Muqdisho

 

Ergada Midowga Yurub ee Soomaaliya ayaa soo dhoweysay shirkii wadatashiga ahaa ee dhawaan dhexmaray Madaxweynaha Soomaaliya Xasan Sheekh Maxamuud. Maxamuud iyo madaxdii hore.

Howlgalka ayaa qoraal uu soo dhigay bartiisa Twitter-ka ku yiri: “MidowgaYurub waxa uu soo dhaweynayaa shirkii wadatashiga ee dowladda Federaalka ay dhawaan la yeelatay madaxda hadda jirta iyo kuwii hore ee Soomaaliya.

Dawlad-dhisidda iyo dimoqraadiyaynta ayaa ah meelaha ugu muhiimsan ee diiradda lagu saarayo Qorshaha Hawl-galka Wadajirka ah.

Madaxweyne Xasan Sheekh, ayaa madaxdii hore ee Soomaaliya ugu yeeray shir wadatashi ah oo ay isku weydaarsanayeen aragtiyo ku aaddan xaaladda Soomaaliya, si ay u dhageystaan ​​fikradahooda ku aaddan amniga, la dagaallanka argagixisada, dhameystirka dib u eegista dastuurka iyo taabagelinta dimuqraadiyadda.

 

Read More

Hay’adda Cunnada Adduunka ee WFP ayaa shaaca ka qaaday in 2.7 milyan oo qof ay ku barakaceen abaarta ka jirta Geeska Afrika

 

Hay’adda Cunnada Adduunka ee Qaramada Midoobay ayaa ku dhawaaqday in abaaraha ka jira Geeska Afrika ay sababeen barakaca ilaa 2.7 milyan oo qof.

Warbixin cusub oo ay soo saartay xaaladda gobolka, WFP waxay ku sheegtay in 1.7 milyan oo qof oo ku nool Soomaaliya, 516,000 oo qof oo ku nool Itoobiya iyo 466,000 oo qof oo ku nool Kenya ay barakiciyeen abaaro.

Warbixinta WFP waxa kale oo ay daaha ka qaaday in boqollaal kun oo qaxooti ah oo gaadhay goobaha ay abaaruhu saameeyeen ee saddexda waddan ay sii kordhinayso cunto yarida gobolka.

Warbixintu waxa ay tidhi: “Gobolka Geeska Afrika waxa soo maray abaaro ba’an oo xagga cimilada ah ka dib xilliyo xidhiidh ah oo ka hooseeya heerka caadiga ah ee roobabka ilaa dabayaaqadii 2020-ka, kuwaas oo saameeyay beeraha, xoolaha, dhirta, kheyraadka biyaha, hab-nololeedka, iyo kheyraadka daaqa.”

Hay’adda Cunnada Adduunka ee WFP ayaa ku qiyaastay in abaarta daba dheeraatay ee Geeska Afrika ay sababtay in 23.4 milyan oo qof ay soo food saartay cunto yari ba’an iyo 5.1 milyan oo carruur ah oo ay soo food saartay nafaqo darro ba’an.

Horraantii sanadkan, Hay’adda Cunnada Adduunka ee WFP waxay ka digtay in xilli roobaad kale oo xun inta u dhaxaysa March iyo May 2023 ay cawaaqib xun ku yeelan doonto bulshooyinka Geeska Afrika oo dhan.

 

Read More

JFS ayaa sheegtay inay burburisay kaydkii Khawaarijta ee waxyaabaha qarxa ee gobolka Galagduud

Ciidanka Kumaandooska xoogga dalka, ayaa howlgallo ka dhan ah Alshabaab ka wada tuulooyinka u dhexeeya degmada Gal-cad iyo degaanka Bud-bud ee gobolka Gal-guduud.

Saraakiil katirsan ciidanka Dowladda oo la hadlay warbaahinta Dowladda ayaa sheegay inay khasaare weyn gaarsiiyeen kooxda Alshabaab.

Howlgalka laga fuliyay gobolka Galgaduud waxaa la sheegay in lagu burburiyay godad Alshabaab ay ku kaydsan jireen sunta iyo alaadaha kale ee ay ka sameeyaan walxaha qarxa.

Dowladdu waxay sheegtay in howlgalka lagu dilay dagaalamayaal badan oo katirsan Alshabaab iyo horjoogayaal. Howlgalkii ugu dambeeyay ayaa ka dhacay deegaan lagu magacaabo Gariyaale, halkaas oo lagu khaarijiyay 18 xubnood oo Shabaab ah. Warbaahinta Dowladda ayaa barteeda telegraamka faafisay sawirrada maydadka Alshabaab.

Taliyaha Guutada 16-aad Ciidanka kumaandooska Danab XDS G/Dhexe Axmed Cabdullaahi Nuur Beeryare, ayaa sheegay in dowladdu ay sii wadayso howlgalkan illaa laga ciribtirayo Shabaabka ku dhuumaalaysanaya deegaanada hoos yimaada degmada Galcad.

Galcad ayaa kamid ah degaanadii laga xoreeyay Alshabaab, horraantii sanadkan, inkastoo Shabaabku ka geysteen mid kamid ah weeraradii ugu khasaaraha badnaa oo uu ku geeriyooday taliye ku xigeenkii ciidanka Danab, Xasan Tuure.

 

Read More

Shirka Wadatashiga ee ka socday Muqdisho oo laga soo Gabagabeeye

 

Waxaa maalintii Khamiistii magaalada Muqdisho lagu soo gaba gabeeyay shir wadatashi ah oo uu shir guddoominayay Madaxweynaha Jamhuuriyadda Mudane Xasan Sheekh Maxamuud, kaasi oo looga hadlayay xaaladda dalka.

Shirkan oo socon doona muddo labo maalmood ah ayaa waxaa ka soo qeyb galay Ra’iisul Wasaaraha Xukuumadda Mudane Xamza Cabdi Berri, Guddoomiyeyaasha Baarlamaannada Golaha Shacabka iyo Aqalka Sare, Guddoomiyeyaashii hore ee Baarlamaanka, Madaxweynayaal hore iyo Ra’iisal Wasaareyaal iyo siyaasiyiin kale oo caan ah.

Madaxtooyada Soomaaliya ayaa sheegtay in ka qeybgalayaashu ay ka doodeen lix qodob oo kala ah Hannaanka Doorashada, Hanaanka Madaxweynaha, Hanaanka Xisbiyada badan, Guddiga Doorashooyinka Qaranka, Mideynta Shuruudaha Hay’adaha Federaalka iyo kuwa Maamul Goboleedyada, iyo hannaanka dhameystirka dib u eegista Dastuurka. .

Madaxtooyadu ma aysan shaacin wax heshiis ah oo laga gaaray qodobadii laga wada hadlay, balse Ra’iisul Wasaare Xamza Cabdi Berri ayaa shirka ku tilmaamay mid horumar leh.

Natiijadii ka soo baxday shirkii golaha wadatashiga qaran ee Muqdisho lagu qabtay bishii May ee la soo dhaafay ayaa muran badan ka dhaliyay dhinacyada siyaasadda Soomaaliya.

Shirka wadatashiga ah ee ay isugu yimaadeen madaxda dowladda federaalka iyo mas’uuliyiintii hore ayaa ahaa mid ay dowladda Soomaaliya ku dooneysay in ay ku qanciso dhinacyada siyaasadda isku haya in ay aqbalaan natiijadan, inkastoo aysan muujin horumarro laga gaaray arrintan inkastoo shirka Muqdisho lagu soo gaba gabeeyay.

 

Read More

Guddoomiyaha Hay’adda SoDMA oo qaabilay wafdi ay hogaaminayso Ku-simaha Safiirka Finland

 

Guddoomiyaha Hay’adda Maaraynta Musiibooyinka Qaranka Mudane Maxamuud Macallim Cabdulle oo ay wehliyaan Lataliya-sare iyo Agaasimayaal ayaa maanta xafiiskiisa ku qaabilay Wafdi ay hogaamineysay Emma Pajunen oo ah qunsulka u qaabilsan Waxbarashada iyo horumarinta bulshada isla markaana ah ku Simaha Safiirka dalka Finland iyo Ida Rasanen oo ah isuduwaha arrimaha siyaasadda iyo horumarinta.

Kulankaan oo isbarasho ku bilawday labada dhinac ah ka dib ayaa  ku simaha Safiirka dalka Finland ahna qunsulka u qaabilsan Waxbarashada iyo horumarinta bulshada warbixin kooban ka siisay

Guddoomiyaha SoDMA howlaha guud ee dalka ka qabtaan iyo teegeerada Mashaariicda maaliyadeed ay dalka Soomaaliya kaga qayb qataanaan hormarintiisa iyo Hay’addaha kala duwan ay la shaqeeyan ayaa aad u soo dhaweeysay soo dhaweeyntii wanaagsaneed ee lagu soo dhaweeyay Xarunta dhexe ee Hay’adda SoDMA.

Guddoomiyaha Hay’adda SoDMA ayaa dhankiisa warbixin kooban ka siiyay xilliga la aasaasay Hay’adda SoDMA iyo howlaha balaaran ay ka qabatay Abaaraha, Fatahaadaha, Gargaarka iyo Gurmadka degdega ah mudadii yareed ay Hay’adda jirtay,

una sheegay in ay sii laba jibaari doonaan, Guddoomiyaha ayaa ku amaanay Dowladda Finland howlaha ay dalka ka qabato uguna mahadceliyay Masuuliyiinta ka socotay Safaarada Finland booqashada ay ku yimadeen Xarunta SoDMA.

 

Read More

RW Xamsa Cabdi Barre, ayaa hoygiisa casho sharaf ugu sameeyay labo kamid ah Ra’iisul Wasaarayaashii dalka soo maray

 

Ra’iisul Wasaaraha Soomaaliya Xamza Cabdi Barre ayaa shalay hoygiisa magaalada Muqdisho kula kulmay Ra’iisul Wasaarayaashii hore ee Soomaaliya Dr. Abdelweli Maxamed Cali “Gaas” iyo Cumar C/rashiid Cali Sharma’arke.

Intii uu kulanka socday ayuu Xamza uga warbixiyay labadii ra’iisul wasaare ee hore guulihii ay dowladda federaalka ka gaartay, gaar ahaan howlgallada ka dhanka ah argagixisada, barnaamijka deyn cafinta ee dalka, qaadista cunaqabateynta hubka iyo mas’uuliyadda amniga ee ciidamada Afrika.

Gaas iyo RW Sharma’arke ayaa kula dar-daarmay madaxda dowladda Soomaaliya inay xoojiyaan dadaallada lagu doonayo in dalka looga xoreeyo dhaq-dhaqaaqa dhallinyarada inta aan la gaarin doorashada.

Dr. C/wali Maxamed Cali Gaas iyo Cumar C/rashiid Cali Sharmaarke ayaa ka mid ah madaxdii hore iyo siyaasiyiintii ka qeyb galaysa shirka wadatashiga ee ka socda magaalada Muqdisho, kaasoo ay soo qaban qaabiyeen madaxda Soomaalidaee hadda jirta.

 

Read More

Soomaaliya iyo Jordan oo kawada hadlay sidii kor loogu qaadi lahaa iskaashiga milatari

 

Wasiirka Gaashaandhigga Xukuumadda Federaalka Soomaaliya Mudane Cabdul Qaadir Maxamed Nuur oo booqasho ku jooga Boqortooyada Hashemite ee dalka Urdun ayaa la kulmay Guddoomiyaha Guud ee Saraakiisha Ciidanka Xoogga Dalka Sareeye Gaas Yuusuf Axmed Al-Hunaiti.

Intii uu socday kulanka, sida ay sheegtay wakaaladda wararka ee Urdun, waxaa looga hadlay mustaqbalka iskaashiga milateri ee labada ciidan ee walaalaha ah, marka laga soo tago xaaladihii ugu dambeeyay ee gobolka iyo caalamka, iyadoo loo eegayo danta ciidamada qalabka sida. laba wadan oo walaalo ah.

Saraakiil badan oo ka tirsan ciidamada xoogga dalka Jordan ayaa ka qeyb galay kulanka, marka laga soo tago wasiirka gaashaandhigga Soomaaliya, Nuur iyo guddoomiyaha guud ee ciidamada xoogga dalka Sarreeye Gaas Hunaiti.

Guddoomiyaha Taliyeyaasha Ciidamada ayaa yiri “Jordan iyo Soomaaliya waxay leeyihiin hadaf mideysan oo ku aaddan horumarinta amniga, nabadda iyo xasilloonida gobolka iyo caalamka, iyadoo kor loo qaadayo iskaashiga wadajirka ah iyo xoojinta xiriirka ka dhexeeya labada ciidan ee walaalaha ah”.

Dhankiisa, Wasiirka Gaashaandhigga Soomaaliya ayaa yiri: “Soomaaliya waxay soo wajahday, sannado badan, dhibaatada argagixisada, taasoo caqabad weyn oo khatar ah ku ah amniga iyo xasilloonida Soomaaliya,” isagoo carrabka ku adkeeyay in Soomaaliya looga baahan yahay inay si degdeg ah uga faa'ideysato khibradaha iyo waayo-aragnimada.

 Ciidamada qalabka sida ee dalka Urdun iyo khibrada dheer ee ay u leeyihiin la dagaalanka argagixisada, si loo horumariyo awooda ciidamada, Soomaaliyeey marka ay wajahaan qatarta kooxaha argagixisada iyo saameynta ay ku leeyihiin bulshada iyo dowladnimada.

 

Read More

RW Xamsa oo Guddoomiyay Shir Looga Hadlay Ku Biirista Bulshada Bariga Afrika (EAC)

 

Ra’iisul wasaaraha xukuumadda Jamhriyadda Federaalka Soomaaliya mudane Xamse Cabdi Barre ayaa shir guddoomiyey kulan ballaaran oo looga hadlayey u diyaargarowga wadahadallada ku biirista Soomaaliya ee urur goboleedka Iskaashiga ganacsiga iyo dhaqaalaha ee bariga Afrika (EAC), kadib markii dhowaan la aqbalay codsiga Soomaaliya inay ka mid noqoto ururkaasi.

Kulanka oo ay ka soo gaybgaleen mas’uuliyiin kala socotay laamaha kala duwan ee dowladda ayaa lagu soo bandhigay heerka u diyaargarowga dowladda Soomaaliya ee xag farsamo iyo dhaqaale.

Ra’iisul wasaaraha oo ka hadlay kulanka ayaa sheegay in ku biirista Soomaaliya ee urur gobolleedka (EAC) ay ugu jirto fursado iyo dano ganacsi, dhaqaale iyo isu socod kuwaasi oo abuuraya maalgashi iyo shaqooyin wax weyn ku soo kordhinaya dhaqaalaha dalkeena. Waxaa uu sheegay in xubinnimada Soomaaliya ay u sahleyso ganacsatada Soomaaliyeed ka mid noqoshada suuq weyn ay kaga faa’iideeystaan inay u iibgeeyaan badeecadahooda iyadoo aan la canshuurin.

Shirka ayaa waxaa warbixinno ku saabsan heerarka kala duwan ee uu soo maray codsiga dowladda Soomaaliya, qaabka loo wajahayo wada xaajoodka iyo waxa ay ka qabsan karto Soomaaliya soo jeediyay Ergayga gaarka ah ee u qaabilsan madaxweynaha Cabdisalaan Hadliye Cumar iyo La taliyaha horumarinta Ganacsiga ee Ra’iisul wasaaraha Cabdiqani Jaamac.

Ra’iisul easaare Xamse Cabdi Barre ayaa ugu dambeyn bogaadiyey shaqada ay qabteen Ergayga gaarka ah ee Madaxweynaha iyo saraakiisha kale ee kala shaqeeyay hawsha lagu guuleystay ee ku-biirista Soomaaliya ee urur goboleedka bariga Afrika (EAC).

 

Read More

Soomaaliya iyo Sacuudiga ayaa ka wada hadlaya sidii ay isaga kaashan lahaayeen xasilinta deegaanada laga saaray Al-Shabaab

 

Wasiirka Arrimaha Gudaha Xukuumadda Federaalka Soomaaliya, Mudane Axmed Mucalim Faki, ayaa magaalada Muqdisho kula kulmay Safiirka Boqortooyada Sacuudi Carabiya, Mudane Axmed Bin Maxamed Al-Muwalad.

Kulanka dhexmaray Wasiirka iyo Safiirka ayaa looga hadlay sidii Soomaaliya iyo Sacuudiga ay isaga kaashan lahaayeen xasiloonida deegaanada laga saaray Al-Shabaab.

Wasiirka Arrimaha Gudaha Federaalka Soomaaliya Mudane Axmed Mucalim Faki ayaa uga mahadceliyey Boqortooyada Sacuudiga taageerada ay Soomaaliya ka geysaneyso dhismaha dalka.

Dhankiisa Safiirka Boqortooyada Sacuudi Carabiya u fadhiya magaalada Muqdisho ayaa uga mahadceliyey Wasiirka Arrimaha Gudaha Federaalka booqashada uu ku yimid xarunta safaaradda ee magaalada Muqdisho.

 

Read More

Ra'iisul Wasaaraha Soomaaliya ayaa isku shaandheyn kooban ku sameeye golaha wasiirada

 

Ra’iisul wasaaraha dawladda federaalka ah ee Soomaaliya Xamse Cabdi Barre ayaa isku shaandheyn ku sameeyey qaar ka mid ah golihiisa wasiirrada, isaga oo xilka ka qaaday wasiirkii maaliyadda, halka uu magcaabay xubno cusub.

Ra'iisal wasaare Xamse Cabdi Barre ayaa xilkii uu ka qaaday wasiirkii maaliyadda ee Soomaaliya Dr. Cilmi Maxamuud Nuur, wuxuu u magcaabay Biixi Iimaan Cige oo hore u ahaa wasiirka shaqada iyo arrimaha bulshada.

Dr. Maxamed Cilmi Ibraahin ayaa loo magcaabay inuu noqdo wasiirka shaqada iyo arrimaha bulshada, isaga oo ah xubin cusub oo ku soo biirtay golaha wasiirada.

Abuukar Jaylaani Sheekh ayaa loo magcaabay inuu noqdo wasiiru-dawlaha awqaafka iyo arrimaha diinta, halka Saadaad Maxamed Nuur loo magcaabay wasiiru-dawlaha wasaaradda arrimaha gudaha iyo federaalka.

Afhayeenka xafiiska ra'iisal wasaaraha Farxaan Maxamed Jimcaale oo warbaahinta u akhriyey wareegtadan ayaa sheegay in masuuliyiinta la magcaabay la farayo inay xilka ula wareegaan sida ugu dhakhsaha badan.

 

Read More

Madaxweyne Xasan" Dowladda waxaa ka go'an inay ka maaranto kaalmo shisheeye"

 

Dal waxaa horumariya dadkiisa oo garab istaag buuxa siiya Dowladda si loo gaaro isku filnaansho buuxa oo dhan waliba ah.

Soomaaliya, waxaa kaalmo buuxa siiya dalal shisheeye, waxayna kaalmadaas ka timaadaa canshuur dad kale laga qaaday, sababta canshuurta loo qaadayo waa in ay Dowladdu bixiso qarashaadkeeda haddii ay tabay caafimaadka, waxbarashada, nabadgalyada,horumarinta kaabayaasha dhaqaalaha iyo howlaha guud.

Haddii si kale u dhigno, canshuurtu waa qarash ay Dowladdu dul saarto alaabaha iyo hantida ma guurtada ah, dakhliga soo gala qofka ama ganacsiyada iyo mulkiilayaasha mehradaha.

Amni buuxa iyo caafimaad tayo ah leh in la helo waxaa udub-dhexaad u ah canshuurta dalka oo la bixiyo si ay Dowladdu awood buuxda ugu yeelato bixinta adeegyada bulshada aas-aasiga u ah.

Canshuur bixiyaashu, waa in ay fahmaan bixinta canshuurta in ay tahay waajib saaran qof walba oo muwaadin ah in dadku canshuurtu bixin micnaheedu waxay tahay in dowladdu shacabkeeda la xisaabtami karin. Soomaaliyana ay sii ahaato dal canshuur bixiyeyaal kale lacag ka suga, waana sababta keentay in madaxdu ku baaqaan in la bixiyo canshuurta.

Madaxweynaha Jamhuutiyadda Federaalka Soomaaliya Mudane Xasan Sheekh Maxamuud ayaa aad bulshada Soomaaliyeed ugala hadlay mudnaanta ay leedahay canshuurta, wuxuu sheegay in muhiim ay tahay canshuurta ay Dowladdu ugu baahan tahay shacabka si dowladda uga maareynto dawarsiga dalalka kale.

” la qarin maayo canshuurta inaan dhiibno waaye, lacagta aan ku yeelan lahayn inaan la imaano waay, maanta wali waxaan joognaa ciidamadeenu wali dad kale ayaa lacagta noo siiyo, nolosha qaarkeed Dowladdu wey bixi, laakin waxay dowladdu bixiso kuma filno waa la kabaa dad kale noo kaba, canshuur wiil kale iyo gabar kale oo dal kale ku nool oo waxay nala wadaagaan jirin oo Diin nala wadaagin oo dadnimo nala wadaagin oo qaaradda aan ku nool nahay ku oolin, war anaga maxaa nahay kan dhuumanaya ee canshuurta ka dhuumanaayo, shabaab ayaa ka cabsanaa Kan leh Dowladda lama shaqeyn karo, war waxaas wax ma ahan howln ma ahan,”.

Madaxweynaha ayaa carabka ku dhuftay in aysan macquul ahayn in ay soo tuugsadaan lacagaha lagu kabo mushaaraadka ciidamada iyo shaqaalaha, iyadoo Soomaaliya haysato kheyraad ku filan, waajibaadka Dowladda ayuu madaxweynuhu tilmaamay ka hortagga dadka dhacaya canshuuraha ay bixiyaan dadka kale.

Haddaba inagoo taas ka tixraaceyna muhiimadda ay leedahay canshuurta, waa in bulshada Soomaaliyeed xil iyo ahmiyad gaar ah iska saaraan sidii ay u bixin lahaayeen canshuurta ,ayagana ay dhankooda u heli lahaayeen adeegyada aas-aasiga u ah ee Dowladdu looga baahnaa.

 

Read More

XFS oo sheegtay inay la wareegtay xarumaha ay baneeyeen 2000 askari oo ATMIS ah

 

Wasiirka gaashaandhigga Soomaaliya ayaa sheegay inay dowladdu la wareegtay xarumaha ay baneeyeen 2000 askari oo katirsan ciidanka Midowga Afrika ee ATMIS.

Wasiirka gaashaandhigga Cabdiqaadir Maxamed Nuur, ayaa ciidamada ATMIS ku ammaanay inay door wanaagsan ka qaateen sugidda amniga iyo wadashaqaynta ay laleeyihiin Dowladda federalka Soomaaliya.

Wasiirka wuxuu sheegay, ciidamada xoogga dalka Soomaaliyeed inay gaareen heer lagu hallayn karo amniga dalka ayna u diyaar garoobeen inta ka dhiman dhammaadka 2024, markaas oo askariga ugu dambeeya ee ciidanka ATMIS uu dalka ka bixidoono.

Wuxuu sheegay wasiirku inay dowladdu masuuliyad weyn iska saaridoonto goobihii ay la wareegeen ciidanka, isagoo sheegay in amni la isku hallayn karo ay dowladdu ka samayndoonto goobaha ay xoreeyeen ciidanka Dowladda.

Si kastaba ha ahaatee, Midowga Afrika ayaa soo dhoweeyay dhameystirka wejiga koowaad dhimista ciidanka ATMIS. Midowga Afrika waxay sheegeen inay ka go’an tahay sugidda amniga Soomaaliya.

Read More

Dhaqaalaha Soomaaliya ayaa sanadihii ugu dambeeyay ku guuleystay in uu kor u kacay 2.4%

 

Xafiiska Tirakoobka Qaranka ee Dowladda Federaalka Soomaaliya ayaa soo saaray warbixin cusub oo muujineysa kobaca dhaqaalaha dalka oo hadda maraya 2.4%.

Warbixintu waxay soo bandhigtay aragtiyo qiimo leh oo ku saabsan xaaladda guud ee dhaqaalaha Soomaaliya iyo sidoo kale hagaha dhaqangelinta siyaasad dhaqaale oo wax ku ool ah oo kicin kara horumarka dalka.

Warbixinta dowladda ayaa lagu sheegay in dhaqaalaha Soomaaliya uu awood u leeyahay inuu muujiyo adkeysi iyo kobac sanadihii ugu dambeeyay inkastoo ay la kulmeen caqabado badan sida abaaro daba dheeraaday iyo khatarta joogtada ah ee Al-Shabaab.

Waxa uu sheegay in dhinaca beeraha oo ay ka shaqeeyaan in ka badan 70% dadka ay yihiin laf dhabarta dhaqaalaha dalka, isla markaana ay ka yihiin 30% GDP.

Adeegga oo isugu jira isgaarsiinta, bangiyada iyo gaadiidka ayaa sidoo kale muujiyay kobac weyn maadaama ay 28% ku biiriyeen wax soo saarka dalka.

Marka laga soo tago is-beddellada wanaagsan ee dhaqaalaha Soomaaliya, warbixintu waxay sidoo kale tilmaantay caqabado dhowr ah oo ay tahay in wax laga qabto si loo joogteeyo loona dardargeliyo kobaca dhaqaalaha.

Caqabadahaas waxaa ka mid ah baahida loo qabo in la horumariyo kaabayaasha dhaqaalaha, kor u qaadista dhaqaalaha, iyo kor u qaadista jawiga ganacsigaiyada oo la dhimayo musuqmaasuqa iyo horumarinta sharciga.

Read More

Madaxweyne Xasan Sheekh oo la kulmay Madaxweynihii hore Shariif Sheekh Axmed

 

Madaxweynaha Jamhuuriyadda Federaalka Soomaaliya Mudane Xasan Sheekh Maxamuud ayaa Madaxtooyada Qaranka ku qaabilay Madaxweynihii hore ee dalka Mudane Shariif Sheekh Axmed.

Madaxweynaha Jamhuuriyadda ayaa la wadaagay Madaxweynihii hore xaalada dalka iyo dadaallada dowladdu ay ku bixinayso xoreynta dalka iyo halganka ciidamada iyo shacabka Soomaaliyeed ay ku jiraan ee argagixisada Alshabaab lagu cirib tirayo.

Dhankiisa, Madaxweynihii Hore ee dalka Mudane Shariif Sheekh Axmed ayaa uga mahadceliyey Madaxweynaha Jamhuuriyadda kulankan wadatashiga iyo soo-dhaweynta ah ee uu ugu fidiyey Madaxtooyada, waxa uuna u rajeeyey dowladnimada iyo shacabka Soomaaliyeed horumar iyo midnimo.

Shariif Sheekh Axmed oo shir jaraa’id galabta ay wada qabteen isaga iyo Maxamed Cabdi Waare ayaa sheegay inuumadaxweyne Xadan kala hadlay xiisada Hirshabelle ee ka dhalatay xil ka qaadistii gudoomiyihii gobolkq Hiiraan Cali Jeyte Cismaan iyo muranka beelaha Xawaadle iyo Abgaal ee deegaanka Xalfooleey.

Read More

Madaafiic lagu weeraray Madaxtooyada Soomaaliya oo geystay khasaare dhimasho iyo dhaawacba leh

 

Warar dheeraad ah ayaa kasoo baxaya tiro madaafiic ah oo lagu garaacay xarunta Madaxtooyada Soomaaliya ee magaalada Muqdisho abaare Salaadii Subax ee Saakay.

Hoobiyaasha ayaa geystay khasaare isugu jira dhimasho iyo dhaawac oo soo gaaray dad shacab ah oo ku sugna guryahooda.

Inta la xaqiijiyay Aabe Soomaaliyeed iyo Gabar uu dhalay ayaa ku dhintay hoobiyaasha mid ka mid ah oo kusoo dhacay gurigooda oo ku yaala xaafad ka tirsan degmada Wartanabadda ee magaalada Muqdisho, waxaana sidoo kale dhaawacyo ay soo gaareen hooyada qoyska iyo xubno kale oo isla qoyska ah.

Wararka waxay intaasi ku darayaan in Aabaha ku dhintay hoobiyaha ku habsaday gurigiisa uu ahaa Macalin Dugsi Quraan oo si weyn looga yaqiinay degmada Wartanabadda ee magaalada Muqdisho.

Dadka ku nool magaalada Muqdisho oo badi hurdaayay xiliga madaafiicdaan dhacayeen ayaa ku toosay mar qura dhawaqa madaafiicda oo ahaa kuwa intooda badan loo tuurayay dhinaca Madaxtooyada Soomaaliya.

Kooxda Al-shabaab ayaa mararka qaarkood madaxtooyada dalka ku weerarta madaafiic, waxaana madaafiicdaasi intooda badan ay ku dhacaan guryo ay dagan yihiin dad shacab ah oo ka agdhaw xarunta madaxtooyada Soomaaliya, taasoo sababta in dhimasho iyo dhaawac ay kasoo gaarto dad shacab ah aan waxba galabsan.

Read More

Wasiirka Arrimaha Gudaha oo la kulmay Wakiilka Midowga Afrika ee Soomaaliya

 

Wasiirka Wasaaradda arrimaha gudaha iyo dib u heshiisiinta Xukuumadda Fedaraalka Soomaaliya Axmed Macalin Fiqi ayaa kulan kula qaatay magaalada Muqdisho Ergayga gaarka ah ee Midowga Afrika u qaabilsan Soomaaliya ahna madaxa ATMIS Danjire Mohamed El-Amine Souef, taliyaha ciidanka ATMIS Lt. Jenaral Sam Okiding iyo taliyaha Booliiska ciidanka ATMIS.

Kulanka ayaa ahaa mid looga arrinsanaayay howlgalada ka dhanka ah kooxda Al-shabaab iyo sidii loo xasilin lahaa deegaanadii dhawaan laga xureeyay dagaalamayaasha Ururka Al-shabaab.

Ergayga gaarka ah ee Midowga Afrika u qaabilsan Soomaaliya Danjire Mohamed El-Amine Souef ayaa dhankiisa balan qaaday in howlgalka ciidanka ATMIS ay kaalin sare ka qaadanayaan howlaha xasilinta deegaanadii laga saaray kooxda Al-shabaab, islamarkaana ay ka go'an tahay garab istaaga ciidanka dowladda Soomaaliya.

Wasiirka Axmed Macalin Fiqi ayaa uga mahad celiyay madaxda howlgalka ciidanka Midowga Afrika ee ATMIS taageerada iyo caawinta ay ciidanka xoogga dalka Soomaaliyeed ka siiyaan la dagaalanka Ururka Al-shabaab.

Gabagabadii kulankaan ayaa kusoo beegmaya, iyadoo todobaadkii lasoo dhaafay ciidanka ATMIS qaar ka mid ah Saldhigyadoodii gobolka Shabeellaha Dhexe ay ku wareejiyeen ciidanka xoogga dalka Soomaaliya.

Read More