Wasiirro,xildhibaanno iyo Gobolka Banaadir oo ka qeybgalay furitaanka xarunta cusub ee Gubadleey

 

Wasiiro iyo Xildhibaano ka tirsan Dowladda FS ayaa ka qeybgalay munaasabadda xarig jarka dhismaha xarun cusub oo ay ku gowlgali doonaan maamulka deegaanka Gubadleey.

Wasiir ku xigeenka Wasaaradda Ganacsiga XFS Cismaan Daallo,xildhibaanAfcadeey iyo Guddoomiyaha Gobolka Banaadir oo ka hadlay xafladdaasi loo sameeyay xaarig jarka xarunta deegaanka Gubadleey ayaa ku ammaanay shacabka halkaasi dadaalka ay u galeen dhismaha xaruntaasi oo noqon doonta goob laga fuliyo adeegga dadweynaha.

Mas’uuliyiintasi waxa ay qireen in ay dadaal ku bixin doonaan sidii deegaanka Gubadleey loogu aqoonsan lahaa Degmo,kadib markii odayaasha dhaqanka iyo waxgaradka kale ay soo jeediyeen tallaanadaasi wax ku oolka ah.

Guddoomiyaha deegaanka Gubadleey C/Laahi Nuur Maxamuud iyo odayaasha deegaankaasi ayaa xaruntaasi cusub ku sameeyay xaflad heer sare ah oo ay la dhaceen madaxdii ka socotay golayaasha dowladda iyo maamulka Gobolka Banaadir.

 

Read More

Dowladda Soomaaliya ayaa ammaantay sida ay Shiinaha uga qeyb qaadaneyso xasiloonida dalka

 

Wasiirka Gaashaandhigga Xukuumadda Federaalka Soomaaliya Mudane C/qaadir Maxamed Nuur, ayaa magaalada Shengchao kulan kula qaatay Safiirka Shiinaha u fadhiya Soomaaliya, iyagoo ka wada hadlay istaraatiijiyad lagu xoojinayo amniga iyo la dagaallanka argagixisada.

Intii uu socday kulanka, wasiirka gaashaandhigga wuxuu ku dheeraaday xiriirka taariikhiga ah ee labada dal, wuxuuna ku ammaanay sida Shiinuhu gacan uga geysanayo xasilloonida dalkiisa, wuxuuna carrabka ku adkeeyay muhiimadda ay u leedahay isku-duubnida caalamiga ah ee dadaalladaas.

Dhankiisa, danjiraha Shiinaha ayaa carabka ku adkeeyay in Soomaaliya ay tahay saaxiib soo jireen ah oo dalkiisa ah, wuxuuna ku ammaanay dowladda Soomaaliya iyo shacabkeeda dadaalka aan kala go’a lahayn ee ay ku xoojinayaan xasilloonida iyo horumarinta hannaanka dowladnimo si waafaqsan himilooyinka guud ee labada dal.

Kulankaan ayaa waxa uu ka dhigan yahay xaqiijinta sida ay uga go’an tahay labada dhinac ee nabadda iyo amniga, waxaana uu tusaale u yahay iskaashiga mustaqbalka ee Soomaaliya iyo Shiinaha.

 

Read More

Baarlamaanka labadiisa aqal oo maanta loo qeybiyay nuqulka wax ka beddelka dastuurka

 

Baarlamaanka dowlaldda Federaalka Soomaaliya labadiisa gole ayaa maanta loo qaybiyay nuqulka u dambeeya ee soo jeedinta wax ka beddelka afarta cutub ee ugu horreeya Dastuurka kumeel gaarka ah.

Qodobbada ugu muhiimsan ee wax ka beddelka lagu sameeyay dastuurka, ayaa sheegaya, in dalku yeelanayo Madaxweyne iyo Ra’iisul wasaare uu soo magacaabayo madaxweynaha, xilkana uu ka qaadi karo.

Qodobada kale ee lagusoo kordhiyay dastuurka ayaa kala ah, in muddada xil haynta hay’adda dastuuriga ee dowladda ay noqonayaan shan sano, madaxda dowlad goboleedyada waxaa loogu yeerayaa hoggaamiyayaal, dalkuna uu yeelanayo saddex xisbi.

Guddiga loo xilsaaray wax ka beddelka dastuurka ayaa sheegay, in 7,470 oo muwaadiniin ah ay aragti ka dhiibteen wax ka beddelka cusub, iyadoo guud ahaan tirada aragtay ee muwaadiniinta Soomaaliyeed lagu sheegay 213,838.  

Maalinta Sabtida ee soo socota ayaa la sheegay in labada gole ee Baarlamaanka ay cod u qaadi doonaan ansixinta wax ka beddelka Dastuurka.

Wax ka beddelka dastuurka waxaa si adag ugasoo horjeeda maamulka Puntland, madaxdii hore ee Soomaaliya iyo siyaasiyiin xilal kasoo qabtay dowladda, kuwaas oo ka digay in madaxweyne Xasan Sheikh uu dastuurka wax ka beddelo.

Read More

Madaxweynaha JFS oo abaalmarinno guddoonsiiyay arday kaalmaha hore ka galeen Tartanka Qur’aanka Kariimka ah

 

Madaxweynaha Jamhuuriyadda Federaalka Soomaaliya Mudane Xasan Sheekh, ayaa munaasabad ku qabsoomtay Madaxtooyada Qaranka

waxa uu afur ku maamuusay Tartameyaasha Quuraanka Kariimka ah, iyadoo ay goobjoog ahaayeen Wasiirka Diinta iyo Awqaafta Xukuumadda, Guddiga Tartanka iyo Hay’adda Culimada Soomaaliyeed.

Madaxweynaha oo abaal-marin guddoonsiiyey 7-da tartame ee ugu sarreeya sannadka labaad ee Tartanka Quraanka Kariimka ee Jamhuuriyadda Federaalka Soomaaliya ayaa sheegay in halyeeyadan ka socda gobollada dalka oo idil ay ka turjumayaan dhaqanka Soomaaliyeed ee ku saleysan diinta Islaamka iyo wanaagga.

Ubadkan sidaas u xifdiyey Quraanka Kariimka ah, waalidka kula dadaalay Kitaabka Alle iyo macallimiinta soo barbaariyey waxay caddeyn u tahay sida dadkeennu ay ugu dheggan yihiin diinteenna Islaamka.

Tani waa xujo adag oo hortaalla argagixisada banneystay dhiigga dadkeenna, iyagoo ku been abuuranaya diinteenna suubban. Imisa ayey xasuuqeen arday baranaysay Kitaabka Alle, macallimiin xifdisiinayey ubadkeenna Kitaabka Alle. Imisa dugsi Quraan ayey dumiyeen, imisa Masaajid ayey burburiyeen ama ku dhex laayeen ehlu Qu’aanka”.

Abaal-marinnada Madaxweynaha Jamhuuriyadda Federaalka Soomaliya Mudane Xasan Sheekh Maxamuud ee Tartanka Quraanka Kariimka ah ayaa waxaa ku guuleystay;

1-Majiidu Raxmaan Maxamed Cabdullaahi, $20,000.

2-Yuusuf Xasan Cusmaan, $15,000.

3-Xuseen Xasan Nuur, $10,000.

4-Sadiiq Maxamed Cali, $7000.

5-Faadumo Jamaal Xaashi, $5000.

6-Maxamed Haaruun Maxamed, $3000.

7-Ikraan Cabdikariim Xasan, $2000.

Read More

Guddoomiyaha Hay’adda Maareynta Musiibooyinka Soomaaliyeed oo la kulmay Jaaliyadda Soomaaliyeed UK

 

Guddoomiyaha Hay’adda SODMA oo kulan soo dhaweyn ah loogu sameeyey UK

Guddoomiyaha Hay’adda Maareynta Musiibooyinka Soomaaliyeed mudane Maxamuud Macallin Cabdulle oo howlo shaqo u jooga dalka UK ayaa kulan soo dhaweyn ah ay u sameeyeen Jaaliyadda Soomaaliyeed ee ku dhaqan magaalada London.

Guddoomiyaha ayaa Jaaliyadda uga warbixiyay xaaladda dalka iyo dadaallada beni’aadannimo ee socda, isagoo u soo bandhigay in ay ka qeyb qaataan wax-ku-darsiga sanduuqa dhaqaale ee loo furayo hay’adda si awood loogu yeesho ka jawaabista gargaarka deg-degga ah.

Jaaliyadda ayaa si weyn uga mahadcelisay sida  ay SoDMA ugu gurmatay dadka gobolka Sool xilligii colaadaha, halka guddoomiyuhu ku boorriyay in ay xoojiyaan garab istaagga dadka nugul ee dalka ku sugan, kuwaas oo wajahaya nolol adag oo gacan qabad u baahan.

 

Read More

Wasiirka Maaliyadda Xukumadda Soomaaliya ayaa maanta kulan muhiim ah la yeeshay Wakiilka Soomaaliya ee Qaramada Midoobay

 

Wasiirka Maaliyadda Xukumadda Federaalka Soomaaliya Biixi Imaan Cige ayaa maanta kulan muhiim ah la yeeshay Wakiilka Soomaaliya ee Qaramada Midoobay Catriona Laing.

Kulankaan oo ka dhacay xarunta Qaramada Midoobay ee magaalada Muqdisho ayaa ahaa mid miro-dhal ah oo looga wada-hadlay arrimaha horumarinta maaliyadda iyo dhaqaalaha Soomaaliya, sida lagu yiri bayaan laga soo saaray kulanka.

Shirka ayaa sidoo kale lagu soo qaaday guushii dowladda Soomaaliyaha ee nnaanka deyn cafinta oo muddo dheer kadib soo gaba-gaboobay daba-yaaqadda sanadkii

Wasiirka Maaliyadda Soomaaliya oo soo saaray qoraal kooban bartiisa X (ex-Twitter) ayaa waxa uu ku sheegay in ay isla meel dhigeen Wakiilka UN-ka ahmiyadda ay leedahay in ay ka wada-shaqeeyaan horumarinta iyo kobcinta dakhliga gudaha ee dowladda Soomaaliya.

Wakiilka Qaramada Midoobay ee Soomaaliya Marwo Catriona ayaa dhankeeda sheegtay in Xafiiska Qaramada Midoobay ee Soomaaliya uu diyaar u yahay xoojinta wada-shaqeynta dowladda Soomaaliya.

Sidoo kale waxay hoosta ka xariiqday sida ay Qaramada Midoobay dadaal ugu bixinayso kor u qaadista taageeridda qorshayaasha dib-u-habeynta maaliyadda iyo horumarinta dhaqaalaha dalka.

Soomaaliya ayaa sanadihii u dambeeyay horumarka ka sameeynaysay dib-u-habaynta dhaqaalaha, koboca dakhliga gudaha, ayada oo dowladda Xasan Sheekh ay ballan-qaaday xoojinta la-dagaallanka musuqa iyo ka miraa-dhalinta hiigsiga “isku filnaansho dhaqaale”.

 

Read More

Guddoomiyaha hey'adda maareynta musiibooyinka SOdMA oo lagu soo dhaweeyay London.

 

Kulan ballaaran oo ay soo qabanqaabiyeen Jaaliyadda Soomaaliyeed ayaa lagu qabtay koofurta magaalada London kaas oo lagu soo dhaweynayay isla markaana uu kula hadlayay.

Intii uu socday kulankan ayay warbixin uga dhageysteen jaaliyadda xaaladda dalka uu ku sugan yahay, sida jaaliyadda Soomaaliyeed ay gacan uga geysan karto gargaarka ay u baahan yihiin dadka Soomaaliyeed.

Max'ed Cumar Macallin "Wayaaka" oo isna ah Xoghayaha arrimaha dibedda ee hey'adda SoDMA ayaa isna ku bogaadiyay dadaalka jaaliyadda ay ku dooneyso in ay dadkooda la qeybsadaan dhibaatada.

Guddoomiye Max'ud Macallin ayaa ku dheeraaday dhibaatooyinka ay wajahayaan shacbiga Soomaaliyeed wuxuu kula dardaarmay in ay ay gacan ka geystaan dadaallada lagu badbaadinayo dadka ay saameynta ku yeelatay dhibaatada ka taagan dalkeenna.

 

Read More

Ra’iisul Wasaaraha Soomaaliya oo daahfuray afur wadareedka sanadlaha ah

 

Ra’iisul Wasaaraha Xukuumadda Jamhuuriyadda Federaalka Soomaaliya Mudane Xmasa Cabdi Barre

ayaa ka qeyb galay Afur Wadareedka Sanadlaha ah ee is aragga Xukuumadda iyo Bulshada Qeybaheeda kala duwan, kaas oo lagu xoojinayo isu soo dhaweynta Xukuumadda iyo Muwaadiniinta. ayna soo qabanqaabisay Wasaaradda Arrimaha Gudaha, Federaalka iyo Dib u heshiisiinta

Kulanka waxaa ka qeybgalay Wasiirka Arrimaha Gudaha, Federaalka iyo Dib u heshiisiinta mudane Axmed Macalin Fiqi, Wasiirka Xanaanada Xoolaha XFS mudane Maxamed Cabdi Xayir Maareeye, Wasiirka Wasaaradda Caafimaadka iyo Daryeelka Bulshada XFS mudane Cali Xaaji,

Wasiirka Gaadiidka iyo Duulista Hawada Marwo Fardowso Cigaal, Wasiirka Wasaaradda Kalluumaysiga iyo Dhaqaalaha Balluugga ah XFS Mudane Axmed Xasan, Wasiirka Wasaaradda Qorshaynya XFS Maxamuud Cabdiraxmaan Beenebeene, Wasiirka Isgaarsiinta iyo Teknoloojiyadda Mudane Jaamac Xasan Khaliif,

 Wasiiru-dowlaha Xafiiska Ra’iisul Wasaaraha XFS, Wasiir Ku-xigeenka Wasaaradda Diinta iyo Awqaafta iyo Guddoomiyaha Gobolka Banaadir ahna Duqa Muqdisho Mudane Yuusuf Xuseen Jimcaale iyo Guddoomiyayaasha Degmooyinka Gobolka Banaadir.

Waxaa kale oo kulanka qeyb weyn ka ahaa bulshada rayidka iyaga oo ka hadlay arrimo muhiiim ah.

 

Read More

Soomaaliya oo qayb ka ah Shirka Sanadlaha ee Midowga Yurub oo looga hadlayo illaalinta Arrimaha Bulshada

 

Jamhuuriyadda Federaalka Soomaaaliya ayaa si rasmi ah loogu casuumay ka qayb galka shirka sanadlaha ah ee Midowga Yurub oo looga hadlo ilaalinta iyo samatabixinta arrimaha Bulshada ee loo yaqaano Social Protection, kaasi oo sanadkaan 2024 ka dhacay magaalada Brussels ee dalka Belgium.

Shirkaan oo ay isugu yimaadaan sanad kasta dhammaan wadamada iyo hay’adaha ka shaqeeya arrimaha samata-bixinta bulshada, ayaa si gaar ah loogu lafa guray tallaabooyinka wanaagsan ee muddooyinkii danbe loo qaaday dhinaca samatabixinta dalalka soo koroya.

Madaxa Barnaamijka BAXNAANO ee Wasaaradda Shaqada iyo Arrimaha Bulshada Xukuumaadda Federaalka Soomaaliya Marwo Fardawsa Cabdullahi oo si rasmi ah u metelaysa Dawladda Soomaaliya, ayaa shirkaas ka qayb gashay, waxayna ka jeedisay khudbad dhaxal-gal ah oo ay kaga hadashay dedaalka ay Dawladda Soomaaliya ku bixisay arrimaha samatabixinta bulshada.

Marwo Fardowsa waxay shirka ka sheegtay in Jamhuuriyadda Federaalka Soomaaliya ay dedaal badan gelisay samatabixinta dadka tabarta daran iyo dadka ku waxyeeloobay dagaalada, barakaca iyo wixii lamid ah.

Sidoo kale waxay ugu baaqday dhamaan hay’adaha Midowga Yurub ee ka shaqeeya ilaalinta arrimaha bulshada muhiimada ay leedahay inay mar kasta ku hawl-galaaan nidaamka ama Qorshaha Qaran ee Dawladda Soomaaliya u dejisay arrimaha samatabixinta bulshada, si loo daboolo baahiyaha gaarka ah ee ay qabaan dadka tabarta daran ee ku nool gudaha Soomaaliya.

Madaxweynaha Midowga Yurub Von Der Leyen ayaa dhankeeda Dawladda Soomaaliya ku bogaadisay dedaalka wanaagsan ee ay ku bixisay arrimaha samatabixinta bulshada, waxayna hoosta ka xaqriiqday inay xoojin doonaan garab istaagga Soomaaliya.

 

Read More

Ra’iisul Wasaare Xamse oo qaabilay Madaxa Hey’adda Qaxootiga Qaramada Midoobay UNHCR

Ra’iisul Wasaaraha Xukuumadda Jamhuuriyadda Federaalka Soomaaliya Mudane Xamsa Cabdi Barre, ayaa Xafiiskiisa ku qaabilay Madaxa Hey’adda Qaxootiga Qaramada Midoobay (UNHCR) Xafiiskeeda Soomaaliya Mr. Charles Mballa.

Ra’iisul Wasaaraha iyo Madaxa Hey’adda Qaxootiga UNHCR ee Soomaaliya, ayaa ka wada hadlay xaaladda qaxootiga iyo barakacayaasha ku nool gudaha dalka iyo sidii howlaha gargaarka ee ay ka wadaan Soomaaliya loogu beddeli lahaa mashaariic horumarineed, si xal waara loogu helo dhibaatooyinka sababa barakaca.

Mudane Xamsa ayaa dul istaagay muhiimadda ay leedahay in howlaha ay hey’addu ka fuliso dalka lagu saleeyo arrimaha horutabinta u leh Xukuumadda, isaga oo intaas raaciyey in loo diyaar garoobo saameynta ka dhalan kara roobabka, maadaama uu nagu soo foolleeyahay xilli roobaadkii.

Mr. Charles Mballa ayaa dhankiisa ballan-qaaday in ay si dhow ula shaqeyn doonaan hey’adaha kala duwan ee dowladda, si loo xaqiijiyo arrimaha mudnaanta leh ee ay ka wada shaqeynayaan labada dhinac.

 

Read More

Kulan lagu Xoojinayey Amniga Caasimada oo xalay lagu qabtay Dayniile

 

Kulan afur wadareed ah oo lagu xoojinayey nabadda iyo amniga caasimadda Muqdisho iyo guud ahaan gobolka Banaadir,

kana qeyb galeen xubno ka tirsan xukuumadda Federaalka Soomaaliya oo ay ka mid yihiin Wasiirka Caddaaladda iyo Dasruurka,Wasiirka Arrimaha Guddaha, guddoonka gobolka Banaadir,kuxigeeka amniga iyo siyaasadda ee G/Banaadir, Taliyeyaasha Laamaha amniga iyo mas’uuliyiin kale ayaa sidoo kale kormeeray qeybo ka mid ah degmada Dayniile.

Kulanka inta uu socday, waxaa kale oo hoosta laga xariiqay sida ay muhiim u tahay isla shaqeynta shacabka iyo laamaha amniga taasi oo suurtogelineysa dardargelinta amniga iyo ka hortagga khatarta Khawaarijta.

Mudane Axmed Macallin Fiqi, Wasiirka Arrimaha Gudaha ee Soomaaliya oo ka hadlay munaasabadda ayaa sheegay in afurka lagu qabtay duleedka Deyniile uu muujinayo dadaallada hay’adaha amniga ee xagga xaqiijinta ammaanka iyo jawaabta weerarkii fulaynimada ahaa ee Khawaarijta ay bakhtigoodu keeneen gudaha caasimadda Muqdisho,

waxaa uuna xaqiijiyay in dagaalka ka dhanka argigixisada uu halkiisa ka sii soconayo isaga oo u digay kooxaha Baraha Bulshada ka taageero Khawaarijta.

 

Read More

Hay’adda SoDMA oo deeq raashin ah u qeybisay qoysas danyar ah

Hay'adda Maareynta Musiibooyinka Qaranka Soomaaliyed ee SoDMA, oo maalmihii danbe waday afurin ay u sameenayso dadka dantayar iyo kuwa barakacyaasha ah

Hay’adda Maareynta Musiibooyinka Qaranka Soomaaliyed ee SoDMA, ayaa maanta 7,000 oo qoys oo iskugu jira danyar iyo barakacyaal waxa ay gargaar mucaawino ay ugu qaybisay Deegaanka Garasbaaleey si gaar ah Xaafadda Galmudug.

Qoysaskaan gargaarka afurinta ah loo qaybiyey ayaa qaarkood waxa ay hore degaanadoodii uga soo barakaceen colaado iyo daadadkii Elniino ee sannadkii tagay dalka ku dhuftay.

Goobta lagu qaybinayey Gargaarkaan waxaa goobjoog ka ahaa Agaasimaha waaxda gargaarka SoDMA Sahra Cali Yuusuf iyo Xildhibaan Qaasim Saciid oo ka tirsan BFS.

Read More

Dowladda Imaaraadka Carabta ayaa cambaareysay weerarkii argagixiso ee lagu qaaday hotel ku yaalla magaalada Muqdisho

 

3 qof oo lagu dilay weerarkii Al-Shabaab, Imaaraadka oo cambaareeyay weerarkii lagu beegsaday hoteel ku yaalla Muqdisho

Imaaraatka Carabta ayaa cambaareeyay Weerarkii Argagixiso ee lagu qaaday Hotel ku yaalla Magaalada Muqdisho ee Caasimadda Soomaaliya, kaasi oo sababay dhimashada iyo dhaawaca tiro dad ah oo aan waxba galabsan.

Wasaaradda Arrimaha Dibadda Imaaraadka Carabta ayaa bayaan ay soo saartay ku sheegtay in Imaaraadku ay si weyn u cambaareynayaan falalkan dambiyada ah, isla markaana ay si joogto ah u diiddan yihiin dhammaan noocyada rabshadaha iyo argagixisada ee ujeeddadoodu tahay khalkhal gelinta amniga iyo xasilloonida oo aan waafaqsanayn shuruucda caalamiga ah.

Weerar ay dabley hubeysan oo ka tirsan Xarrakatul Shabaabul Mujaahidiin ku qaadeen maanta oo Khamiis ah hoteel caan ah oo ku yaalla caasimadda Soomaaliya ee Muqdisho, iyo go'doomin ay ku jireen muddo 13 saacadood ah, ayaa sababay dhimashada saddex qof iyo dhaawaca 27 qof. kuwo kale, ayay booliisku ku dhawaaqeen Jimcihii, iyagoo xusay in dhammaan shantii qof ee weerarka soo qaaday la dilay.

Afhayeenka Booliska Gaashaanle Sare Qaasim Axmed Roobli oo shir jaraa’id qabtay ayaa yiri: “Saddex qof ayaa ku dhintay weerarka, 27 kalena waa ay ku dhaawacmeen, oo ay ku jiraan 18 rayid ah iyo sagaal askari,” isagoo intaa ku daray in dadka dhaawacmay ay ku jiraan saddex askari.

Iyadoo ururka islaamiga ah ee xiriirka la leh Al-Qaacidda ay sheegteen mas’uuliyadda weerarka lagu qaaday hoteelka, ayaa Rooble wuxuu xaqiijiyay subaxnimadii jimcaha in la dilay dhammaan shanta dableyda.

Al-Shabaab ayaa weeraray Hotelka

Hoteelka laftirkiisa ayaa sanadihii lasoo dhaafay waxaa lagu qaaday weeraro hore oo Al-Shabaab ay ku qaadeen, waxaana weerarkii ugu dambeeyay uu noqonayaa kii shanaad tan iyo sanadkii 2015-kii, weerarkii ugu dambeeyay ee Hotelka ayaa dhacay December 2019 waxaana ku dhintay 5 ruux (Saddex ruux). dad rayid ah iyo laba askari oo ka tirsan ciidamada ammaanka).

Waxaa xusid mudan in Hotelka la weeraray uu ku dhow yahay afaafka hore ee laga galo Madaxtooyada Villa Somalia, oo ay ku jiraan Xarunta Madaxtooyada Jamhuuriyadda, Xafiisyada Ra’iisal Wasaaraha, iyo dhismooyinka Wasaaradaha qaarkood.

Wasaaraddu waxay tacsi tiiraanyo leh u dirtay dowladda Soomaaliya iyo shacabka Soomaaliyeed ee walaalaha ah, iyo qoysaskii iyo qoysaskii ay ka geeriyoodeen dadkii ku dhintay fal-dembiyeedkaas, waxayna u rajeysay dhammaan kuwa ku dhaawacmay in uu caafimaad degdeg ah siiyo.

 

Read More

Madaxweyne Xasan Sheekh oo booqdey dhaawacyadii Hotel SYL iyo NISA

 

Madaxweynaha JFS oo booqday dhaawacyada dadkii ku waxyeeloobay weerarkii khawaarijta

Madaxweynaha Jamhuuriyadda Federaalka Soomaaliya Mudane Xasan Sheekh Maxamuud ayaa maanta booqday Isbitaalka Erdogan ee magaalada Muqdisho oo lagu dabiibayo qaar ka mid ah dhaawacyada, mas’uuliyiin iyo muwaadiniinta kale ee ku wax yeeloobay weerarkii argagixisada al-Shabaab ee ka dhacay hotelka SYL.

Dhaawacyada waxaa ka mid ahaa Xildhibaano ka tirsan Golaha Wakiilada iyo masuuliyin kale oo ka tirsan xafiiska raysalwasaaraha. Tirada guud ee dhaawaca la gaarsiiyey Isbitaalka Erdogan ayaa 12 qof.

Madaxweyne Xasan Sheekh ayaa ugu dambeyn kormeer ku tagay xarunta hay’adda Hay’adda Sirdoonka iyo Nabad-Sugidda Qaranka NISA, halkaasi oo uu ku dhageystay warbixino horudhac ah oo ku saabsan weerarkii argagixiso ee hotel SYL.

Weerarkan ayaa muujinaya fashil dhanka amniga ah, maadaama Hotel SYL uu u jiro xayndaabka Villa Somalia, waddooyinka soo galana si weyn loo ilaaliyo

 

Read More

Soomaaliya oo laga cafiyay deymihii ay ku lahaayeen waddamada la isku yiraahdo Paris Club

 

Soomaaliya oo 99% laga cafiyay deymihii ay ku lahaayeen waddamada la isku yiraahdo Paris Club

Dowladda federaalka Soomaaliya ayaa mar kale guul wayn ka gaartay barnaamijka dayn cafinta, kadib markii Naadiga Paris uu cafiyay 99% daynmihii uu ku lahaa Soomaaliya,  taas oo ah tallaabo muhiim ah oo laga gaaray dadaallada ay dowladda federaalka ku dooneyso inay dib ugu biirto nidaamka maaliyadeed ee caalamka.

Magaaladda Paris ee dalka Faransiiska,ayaa waxaa ku sugan wafti uu horkacyo wasiirka maaliyada Soomaaliya  iyadoo halkaas lagu soo gebagebayay wada xaajood wakhti dheer qaatay oo ay la yeelanay waddamada ku middoobay naadiga Paris ( Paris club)

oo ku lahaa Soomaaliya lacag ka badan 3.1 billion oo doolar, iyada oo laga duulayo isafgaradka laga gaadhay wada xaajoodka ayaa waxa toban ka waddan ee ku bahoobay Naadiga Paris ay kala saxeexdeen heshiis lagu dhaafayo dentii ay Soomaaliya ku lahaayeen.

Tallaabadan ayaai waxay ka dhigantahay in Naadiga Paris Club ay u dhaafeen xaddi deyn oo ah in ay ka cafinayaan lacag dhan 1.2 bilyan oo dollar, taas oo ka badan intii ku waajibka ku ahayd hannaanka dayn cafiska (beyond HIPC debt relief) ee loo yaqaan HIPC.Si loo sugo dhammaystirka hannaankan

Qorshahan ayaa waxaa sii xigi doona heshiisyo gaar gaar ah oo dal kasta lala gali doono, si ay si rasmi ah daynta uga masaxaan buugaagtooda.

Waxay tani marag ka tahay horusocodka joogtada ah ee dadka iyo Dawladda Soomaaliyeed ay ka samaynayaan dawladnimada dhiska, koboca dhaqaalaha iyo maamul wanaaga.

“Waxaan ku boggaadinayaa dalaka daynta inaga dhaafay deeqsinimadooda iyo garab istaagooda” ayuu yiri Biixi Imaan Cige oo ah Wasiirka Maaliyadda Soomaaliya.

Sidoo kale wuxuu raaciyay “Waxaan joogna magaaladda Paris ee dalka Faransiiska oo aan kaga qeyb galayno  wadda xaajood aad u ballaaran oo aan la yeelanayno naadiga Paris Club oo ay ku midaysan yihiin 10-ka dal ee deymaha ugu badan nagu lahaa,Soomaaliya waxay soo martay geedi dheer oo  ahaa hanaan dib u dhis iyo qaabeyn hay’daha dowladda ah”.

Bishii Diseenbar ee sanadkii la soo dhafay 2023, waxaa Hay’ada Lacagta ee IMF  iyo bangiga Aduunka ay ku dhawaaqeen in ay Soomaaliya soo buuxisay sharuudaha deyn cafinta si ay u hesho deyn cafin dhameystiren, intaas ka dib waxaa waajib noqtay in aan wadda xaajood la bilowno dalalkii deymaha nagu lahaa oo ay mudnaanta lahayeen naadiga Paris Club.

 

Read More

Guddoomiye Ku xigeenka Hay’adda Maareynta ee SoDMA oo la kulmay Safiir ku xigeenka Safaaradda Imaaradka Carabta

 

Guddoomiye Ku xigeenka Hay’adda Maareynta Musiboyinka Qaranka ee SoDMA Dr. Axmed Cabdi Aadan, ayaa maanta la kulmay Safiir ku xigeenka Safaaradda Imaaradka Carabta Md. Seyf Cali Al-rashaash.

Kulankaan ayaa looga hadlay sidii Dowladda Imaaradka Carabta ay hay’adda SoDMAuga caawin laheyd dib u habeynta biyo xireenka Sabuun ee duleedka degmada Jowhar, oo muddo aan helin wax dib u dayactir ah, muhiimna u ah beeralayda ku nool Gobolka Shabeellada Dhexe,

sidii gargaar Dowladda Imaaradka Carabta u garsiin laheyd meelaha fog-fog ee dalka shacabka ku nool, si gaar ah maamulada Koonfur Galbeed iyo Jubbaland iyo sii xoojinta xiriirka u dhaxeeya labada dhinac.

Guddoomiye Axmed ayaa Dowladda Imaaradka Carabta uga mahadceliyey sida hagar la’aanta ah ee ay u garab taganyihiin shacabka Soomaaliyed iyo Dowladdooda.

 

Read More

Madaxweyne Xasan Sheekh Maxamuud oo laba arrin ka dalbaday shacabka

 

War qoraal ah oo kasoo baxay xafiiska Madaxweynaha Jamhuuriyadda Federaalka Soomaaliya ayaa waxaa looga hadlay bilashada bisha barakeysan ee Ramadaan oo maanta kow ah, maadaama laga sooman yahay waddamada Islaamka oo ay ka mid tahay Soomaaliya.

Ugu horreyn Madaxweyne Xasan Sheekh ayaa hambalyo u diray guud ahaan dadka Soomaaliyeed, isaga oo la wadaagay hambalyada munaasabadda bisha Ramadaan.

“Dhammaan shacabka Soomaaliyeed iyo guud ahaan caalamka Islaamka waxaan idiin ku hambalyeynayaa munaasabadda barakaysan ee bilashada bisha Ramadaan” ayuu Xasan Sheekh Maxamuud.

Madaxweynaha ayaa sidoo kale shacabka Soomaaliyeed ka dalbaday laba arrin oo muhiim ah, wuxuuna ka dalbaday inay caawiyaan dadka danta yar iyo inay u duceeyaan dalka, si looga gudbo xaaladaha adag.

“Bisha naxariista iyo dambi dhaafka awgeed, waxaan dadka Soomaaliyeed ku baraarujinayaa in ay u istaagaan taakuleeynta dadkeenna danyarta ah, oo ay badiyaan Rabbi-bariga bishan barakaysan oo dalka iyo dadkaba ugu duceeyaan amni iyo barwaaqo” ayuu mar kale yiri madaxweynuhu.

Waxaa kale oo uu sii raaciyay “Alle ha inaga aqbalo acmaasha wanaagsan, Ramadaan kariim”.

Dhankiisa ra’iisul wasaare Xamza ayaa hambalyo u diray shacabka “Waxaan hambalyo ku aadan curashada bisha barakeysan ee Ramadaan u dirayaa dhammaan Ummadda Muslimiinta ah, gaar ahaan shacabka Soomaaliyeed.

Sidoo kale wuxuu kusii daray “Waxaan Allaah (SWT) waydiisaneynaa inuu na waafajiyo cibaadada bisha Soon, sidoo kalena uu naga aqbalo”.

 

Read More

Raashiin gargaar ah oo ka timid Imaaraadka oo laga qeybiyay Xamar weyne

 

In ka badan 200 qoys oo ka mid ah shacabka degmada Xamar weyne ayaa maanta ka faaideystay raashiin gargaar ah oo dowladda Istuga Imaaraadka Carabta ugu deeqday.

Raashiinka oo ka kooban noocyada kala duwan ee cuntada ayaa Imaaraadka Carabta ugu talagashay in ay ku soomaan dadka danta yar ee ku nool gobolka Banaadir.

Qaar kamid ah dadkii loo qeybiyay raashinka ayaa dowladda iyo shacabka Imaaraadka Carabta ugu mahadceliyay sida ay mar walba u garan taagan yihiin.

Guddoomiyaha degmada Xamar weyne, Cabdiqadir Maxamed Sheekh Cismaan ayaa dhankiisa ka mahad naqay deeqda raashiinka ah ee la soo gaarsiiyay shacabka degmada.

Shalay ayaa sidan oo kale Imaaraadka Carabta waxay raashiin gargaar ah gaarsiiyay shacabka degmada Shingaani ee gobolka.

Barnaamijkan ayaa qeybka ah taakuleynta u sameynayaan shacabka tabaalaysan inta lagu jiro bisha barakeysan ee Ramadan.

 

Read More

Ra iisulwasaare Xamsa oo xarigga ka jaray Xarunta ka hortagga isbeddelka cimillada

 

Ra’iisul Wasaaraha ayaa xariga ka jaray xarun cusub oo loogu talagalay ka hortagga isbeddelka cimilada iyo xaalufka deegaanka

Ra’iisul Wasaaraha Jamhuriyadda Federaalka Soomaaliya, Xamsa Cabdi Barre ayaa maanta xarigga ka jaray Xarun cusub oo qayb ka qaadanaysa ka hortagga isbeddelka cimillada iyo nabaadguurka deegaanka.

Ra’iisul Wasaaraha ayaa bogaadiyey dadaalka Wasaaradda Deegaanka iyo Isbeddelka Cimillada ee la xiriira sidii loo heli lahaa Soomaaliya cagaaran oo ka guuleysata saameynta ay isbeddelka cimilladu ku yeelatay deegaanka.

Mashruucan oo qeyb ka ah hirgelinta hal abuurkii Madaxweynaha Jamhuuriyadda ee Soomaaliya Cagaaran iyo beerista 10, milyan oo Geed, ayaa waxa hirgelinteeda iska kaashaday Wasaaradda Deegaanka iyo Isbeddelka Cimillada iyo Shirkadda ka hortagga abaaraha, horumarinta deegaanka iyo duurjoogta ee Afrika (ADILP).

Read More

Imaaraatka Carabta ayaa wali sii wada deeqaha ay siiyaan Soomaaliya

Hay’adda Maareynta Musiibooyinka Soomaaliya ayaa guddoomay shixnad labaad oo gargaar ah oo ay ku deeqday dowladda Imaaraadka Carabta. Munaasabadan oo lagu qabtay garoonka Aadan Cadi ee magaalada Muqdisho ayaa waxa ay ka dhigan tahay tallaabo muhiim ah oo loo qaaday shacabka Soomaaliyeed xilliyada adag.

Raritaanka waxaa ku jira qaybo kala duwan oo ah cuntooyinka aasaasiga ah, si taxadar leh loo doortay si loo daboolo baahiyaha degdegga ah. Laga soo bilaabo badarka aasaasiga ah ilaa sahayda cuntada, tabarucaadka Imaaraadku waxa uu higsanayaa in uu yareeyo gaajada iyo in kor loo qaado sugnaanta cuntada ee kooxaha nugul.

Gargaarkan ayaa lagu daabulay diyaarad xamuul ah oo ay leedahay dowladda Imaaraadka Carabta, taasoo calaamad u ah xiriirka xooggan ee labada dal. Saadka hufan ayaa xaqiijiyay imaatinka sahayda muhiimka ah ee wakhtiga ku haboon, taasoo xoojinaysa ka go'naanta Imaaraadka ee gargaarka bini'aadantinimo.

Kaaliyaha Madaxa Hay’adda Maareynta Musiibooyinka C/raxmaan Waaxid ayaa si gaar ah uga guddoomay deeqdan mas’uuliyiinta Safaaradda Imaaraadka Carabta ee Muqdisho. Wuxuu si kal iyo laab ah ugu mahadceliyey magaca shacabka Soomaaliyeed, isagoo u aqoonsaday Imaaraadka inuu yahay saaxiib adag xilliyada ay u baahan yihiin.

Mr. Waaheed ayaa yiri: “Dowladda Imaaraadku waxay si joogto ah u gacan siineysaa Soomaaliya. Taageeradooda walaalnimo waxa ay wax weyn ka bedeshay nolosha muwaadiniinteena”.

Iyada oo ay sii socoto gaarsiinta gar gaarka maalmaha soo socda, Hay’adda Maareynta Musiibooyinka Soomaaliyeed waxa ay weli ka go’an tahay qeybinta wax ku oolka ah iyo in si siman loo gaaro. Ballanqaadka Imaaraatka ee aan leexleexa lahayn wuxuu u adeegaa sidii iftiin rajo mustaqbal ifaya oo Soomaaliya ah.

 

Read More

Madaxweynaha ayaa la kulmay wasiir ku xigeenka arrimaha dibadda Norway

 

Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud oo dalka dib ugu soo laabtay ayaa kulan la qaatay Wasiir Ku-xigeenka Arrimaha Dibadda dalka Norway, Mudane Andreas Kravik oo booqasho ku yimid caasimadda Muqdisho.

Kulanka ayaa looga hadlay xiriirka labada dal, iskaashiga dhinacyada horumarinta, amniga, ladagaalanka argagixisada iyo xasilinta deegaanada laga xoreeyay Khawaarijta.

Madaxweynaha Jamhuuriyadda ayaa uga mahadceliyey dowladda Norway taageerada ay la garab taagan tahay Soomaaliya, dadaallada lagu xoojinayo amniga iyo dowlad dhiska. Sidoo kale, Madaxweynaha wuxuu ku boorriyay Norway in ay sii kordhiso doorka ay ka qaadato horumarinta, wax ka qabashada saamaynta isbaddalka cimmilada, xasiloonida Soomaaliya iyo gobolka.

Dhankiisa, Wasiirka Ku-xigeenka Arrimaha Dibadda Norway ayaa bogaadiyay horumarka dowlada ay ku tallaabsatay, gaar ahaan amniga iyo dowlad dhiska, isagoo xusay in Norway ay sii wadi doonto taageerada iyo garab istaagga dowladda.

Read More

Guddoomiye Ku-xigeenka kowaad ee Golaha Shacabka oo kulan la qaadatay Safiirka Shiinaha

 

Guddoomiye Ku-xigeenka kowaad ee Golaha Shacabka Baarlamanka Jamhuuriyadda Federaalka Soomaaliya Sacdiyo Yaasiin Xaaji Samatar,

ayaa maanta booqatay Safaarada Shiinaha ay kuleedahay Magaalada Muqdisho waxaana soo dhaweeyay safiirka u fadhiya Dalka Ambassador Fei Shengchao.

Labada mas’uul ayaa ka wada-hadlay xoojinta xirriirka iskaashi iyo wax wada qabsi ee labada dal ee walalaalaha ah, howlaha horutabinta u leh Golaha Shacabka ee Baarlamaanka Jamhuuriyadda Federaalka Soomaaliya iyo sidii muhiimad gaar ah loo siin lahaa shuruucda taageereysa amaanka guud iyo xasilloonida dalka, horumarinta waxbarashada iyo awoodsiinta haweenka Soomaaliyeed.

Ambassador Fei Shengchao, ayaa Guddoomiyaha ugu hambalyeeyay in ay noqotay Gabadhii ugu horeysay ee xilalka ugu sareeya dalka soomaliya qabata, isagoo u rajeeyay in ay ku guuleysato howlaha hor yaalla, isagoo muujiyay sida dowladda Chinaha u garab taagan tahay Soomaaliya.

Sidoo kale Guddoomiye Sacdiyo Yaasiin Xaaji Samatar, ayaa uga mahadcelisay Dowladda Shiinaha taageeradeeda,garab istaaga dowladda iyo shacabkaSoomaaliyeed.

 

Read More

Imaaraatka Carabta ayaa Soomaaliya siiya raashin mucaawino ah

 

Hay'adda Maareynta Musiibooyinka Qaranka Soomaaliyed ee SoDMA, ayaa maanta Munaasabadd Kooban oo ka dhacday Garoonka Aadan Cade

waxa ay dowladda Imaaraadka Carabta kala wareegtay Shixnad gargaar ah oo ka kooban qaybaha kala duwan ee raashinka.

Shixnadaan gargaar ayaa waxaa waday mid kamid ah diyaaradaha xamuulka qaada ee dowladda Imaaraadka Carabta, waxana uu ku soo aaday xilli Bisha Barakaysan ee Ramadaan fooda inagu soo hayso.

Guddoomiye ku-xigeenka Hay'adda Maareynta Musiibooyinka Dr Axmed Cabdi Aadan oo ay wehliyaan Agaasimayaal ka tirsan SoDMA, ayaa shixnadaan kala wareegay Masuuliyiin ka socday Safaaradda Imaaraadka Carabta ee Muqdisho,

isaga oo ballanqaaday in mucaawinadan ay gaarsiin donaan shacabkaSoomaaliyeed ee danta yar iyo kuwa barakacyaasha ah madaama haatan laguda galayo bisha Ramadaan.

 

Read More

Guddoomiye Ku-xigeenka kowaad ee Golaha Shacabka Baarlamaanka Sacdiyo Yaasiin oo booqatay Safaraadda Dwladda Imaaraatka

 

Guddoomiye Ku-xigeenka kowaad ee Golaha Shacabka Baarlamaanka Jamhuuriyadda Federaalka Soomaaliya Sacdiyo Yaasiin Xaaji Samatar

ayaa maanta booqatay Safaraadda Dwladda Imaaraatka Carabta ee Muqdisho waxaana ku soodhaweeyay Safiirka ufadhiya dalka Amb.Axmed Jumca Al-Rumeysi.

Ugu horeyn Guddoomiye Sacdiyo Yaasiin Xaaji Samatar ayaa Danjiraha Dalka Imaaraadka Carabta uga tacsiyadeeysay saraakiishii ku geeriyootay weerarkii argagixisanimo ee 10- febraayo 2024 kadhacay Xerada Gen.Gordan ayagoona dalkeenna u joogay ineey gacan ka geystaan dib u dhiska Ciidamada Qalabka-sida,

Intaasi kadib Guddoomiyaha iyo safiirka ayaa ka wada hadlay xoojinta xiriirka iyo iskaashiga ka dhaxeeya labada Baarlamaan Soomaaliya iyo Imaaraatka Carabta.

Ugudanbeeyn Guddoomiye Sacdiyo ayaa uga mahadceliysay Dowladda Imaaraatka Carabta taageerada ay siiso Soomaaliya.

 

Read More

Laftagareen ayaa maanta kulan gaar ah la yeeshay safiirka Isu tegga Imaaraadka Carabta

 

Madaxweynaha maamulka Koonfur Galbeed, Mudane Cabdicasiis Xasan Maxamed (Lafta-gareen) oo haatan ku sugan gudaha magaalada Muqdisho ee caasimada Soomaaliya ayaa ka bilaabay kulamo kala duwan oo xasaasi ah.

Madaxweyne Lafta-gareen ayaa maanta kulan gaar ah la yeeshay safiirka Isu tegga Imaaraadka Carabta ee arrimaha Soomaaliya, Mudane Axmed Jumca Al-rumeysi, kaasoo uu kala hadlay arrimo ku aadan wada shaqeyntooda maamulka Koonfur Galbeed.

Labada mas’uul ayaa kulankooda waxa ay diiradda ku saareen 4 qodob oo kala ah xoojinta amniga, kobcinta mashariicda, taagerida tababarida iyo qalabaynta ciidanka iyo hormarinta kaabiyaasha dhaqaalaha, sida lagu sheegay qoraal kasoo baxay madaxtooyada Koonfur Galbeed oo lagu faahfaahiyay kulanka labada dhinac.

Madaxweynaha iyo Danjiraha ayaa ka wada hadlay dhinacyada Xoojinta amniga, kobcinta Mashariicda, Taagerida Tababarida iyo Qalabaynta Ciidanka iyo Hormarinta Kaabiyaasha dhaqaalaha” ayaa lagu yiri.

Sidoo kale waxaa la sii raaciyay “Kulanka Madaxweynaha waxaa ku wehlinayey Agaasimaha Guud Madaxtooyada Dowladda Koonfur Galbeed Mudane Cabdifatah Mahad Cabdiraxmaan.”

Kulankan ayaa kusoo aaday xilli xasaasi ah, isla markaana Koonfur Galbeed ay wajaheyso xaalado adag, sida dooda ka taagan arrinta doorashada iyo dagaalka ka dhanka ah kooxda Al-Shabaab.

 

Read More

Guddoomiyaha SoDMA oo la kulmay safiirka Imaaraadka Carabta

 

Safiirka Dowladda Isutagga Imaaraadka Carabta u fadhiya Soomaaliya Mudane Axmed Juma Al Rumaithi ayaa kulan la qaatay Madaxa Hay’adda Maareynta Masiibooyinka Soomaaliya Maxamuud Macallin Cabdullaahi, waxaana uu kala hadlay Mashaariicda Imaaraadku ku taageerayo Dowladda. iyo shacabka Soomaaliyeed.

Kulanka ayaa diiradda lagu saaray baahiyaha degdega ah ee ay qabaan dadka nugul ee ay saameeyeen daadadka El Niño, kuwaas oo sababay barakaca kumanaan qoys iyo burburka dalagyada iyo kaabayaasha dhaqaalaha.

Safiirka ayaa intii uu kulanka socday tilmaamay in bisha Ramadaan ka hor ay Imaaraadku gargaar gaarsiin doonaan goobaha ay dhibaatadu ka dhacday iyo dayactirka biyo xireennada si loo yareeyo khatarta fatahaadaha ee la filayo in ay ka dhashaan roobabka gu’ga.

Safiirka ayaa uga warbixiyey madaxa hay’adda horumarka laga sameeyey ceelasha ay Imaaraadku maalgaliyeen ee lagu gaarsiinayo bulshada biyo nadiif ah, wuxuuna sheegay in la soo gebagebeeyey wejigii koowaad ee mashruucan oo ay ka mid ahaayeen qodista boqol ceel, wejiga labaadna uu yahay. iyadoo la fulinayo oo 100 ceel laga qodayo.

Madaxa hay’adda ayaa dhankiisa sheegay in dowladda Imaaraadka Carabta uu uga mahadcelinayo taageerada joogtada ah ee ay la garab taagan tahay dowladda Soomaaliya iyo shacabka Soomaaliyeed, waxaana uu sheegay in Imaaraadka uu yahay saaxiib iyo saaxiib dhab ah oo Soomaaliya la wadaaga, isla markaana ay wada shaqeyn karaan. Labada dal waxay sare u qaadi doonaan jiritaanka iyo horumarka Soomaaliya.

 

Read More