Madaxweynaha Jamhuuriyadda Federaalka Soomaaliya, Mudane Xasan Sheekh
Maxamuud iyo wafdi uu hoggaaminayo ayaa gaaray magaalada Sharma Sheekh si ay
uga qeyb galaan shirka cimilada adduunka.
Madaxweynaha iyo khubarada cimilada ee la socota ayaa la filayaa in ay
madaxda caalamka uga warbixiyaan saameynta xoogga leh ee isbedelka cimiladu ay
ku yeelatay nolosha dadka Soomaaliyeed iyo qorshayaasha dowladda ee wax ka
qabashada abaaraha, fatahaadaha iyo dhibaatooyinka kale ee ka dhalan kara
isbedelka cimilada.
Madaxweynaha Masar C/fataax Al-Siyaasi oo kulan la qaatay Madaxweyne Xasan
Sheekh oo barbar socday shir madaxeedka dalalka Carabta ee ka dhacay dalka
Aljeeriya, ayaa ballan qaaday inuu indhaha caalamka ku soo jeedin doono
saameynta isbeddelka cimilada ee Soomaaliya inta uu socdo shirka uu dalkiisa
martigelinayo.
Wafdiga Madaxweyne Xasan Sheekh ayaa xaley ka ambabaxay Muqdisho, waxayna
gaareen magaalada uu shirkaasi ka furmayo ee Sharma Sheekh, halkaas oo ay ku
soo dhaweeyeen masuuliyiin ka tirsan dowladda Masar.
Ra’iisul Wasaare ku xigeenka dalka, wasiirka arrimaha dibadda, wasiirka
bii’ada iyo wasiiru dowlaha madaxtooyada ayaa madaxweyne Xasan Sheekh safarkaan
ku wehliya.
Xaalada Soomaaliya ayaa meel wanaagsan mareysa intii uu xilka hayay
Madaxweyne Xasan Sheekh Maxamuud, horumarkuna waa mid cad oo joogto ah
War saxafadeed kasoo baxay Wasaaradda Warfaafinta Soomaaliya ayaa lagu
sheegay in ciidanka Nabadsugida iyo Sirdoonka Qaranka Soomaaliya howlgalo
qorsheysan oo ay ka sameyeen deegaanka Galka Saalimoow oo ka tirsan gobolka
Shabeelaha hoose lagu dilay dagaalamayaal ka tirsan Al-shabaab.
Howlagalka ciidanka NISA ay ka sameeyeen deegaanka Galka Saalimoow ayaa la
sheegay inuu yimid kadib markii ciidanka ay heleen xog la xariirta in
dagaalamayaal ka tirsan Shabaab ay isku aruursanayeen deegaankaasi.
Warsaxafadeedka Wasaaradda Warfaafinta Soomaaliya ayaa lagu sheegay in
howlgalka inta uu socday lagu dilay 21-xubnood oo mid ah dagaalamayaasha kooxda
Al-shabaab, laguna dhaawacay 10 kale, islamar ahaantaana howlgalka uu ahaa mid
sidii loo qorsheeyay u dhacay oo looga hortagay dhamaan qorshihii Al-shabaab u
maleegayeen shacabka Soomaaliyeed.
Qoraalka kasoo baxay Wasaaradda Warfaafinta ayaa sidoo kale lagu sheegay in
afartii maalmood ee u dambeeysay Al-shabaab laga dilay ku dhawaad 200 oo ka mid
ah dagaalamayaashooda.
Afhayeenka Wasaaradda Gaashaandhiga Xukuumadda Fedaraalka Soomaaliya
Cabdullaahi Cali Caanood oo shalay shir jaraa'id ku qabtay magaalada Muqdisho
ayaa faahfaahin dheeraad ah waxa uu ka bixiyay dagaalkii Cuslaa ee maalin ka
hor ka dhacay deegaanka Ceelhareeri ee gobolka Hiiraan.
Afhayeenka ayaa warbaahinta ka hor sheegay in ciidamada dowladda iyo kuwa
deegaanka markii ay gudaha u galeen deegaanka Ceelhareeri ay la kulmeen dhacdo
la yaab noqotay oo uu ku sheegay in ciidamada iskaashanaya ay difaacyadii
Shabaabka laga saaray ugu tageen meydadka dhalinyaro toban toban isugu xiran oo
bam lagu qarxiyey, iyadoo qaarkoodna ay rasaas ku tiilay, isagoo arintaasi ku
tilmaamay inay cadeyneyso in la soo raafay dhalinyaradaasi.
"Ciidamada xoogga dalka waxay ku arkeen deegaanka Ceelhareeri arrin la
yaab leh oo aan horey noo soo marin dhalinyarada maleeshiyada Al-Shabaab oo
toban toban ka tiinad ugu xiran tahay xabadduna ku wada taalo qaarna bam lagu
qarxiyay ay ku dhinteen, ayay ugu tageen difaacyada shabaab, taasina waxay
daliil u tahay dadka inay soo raafeen oo ay soo qasbeen oo laga cararayo oo qof
walba rabo inuu ka cararo, maadaama ay qasbayaan” ayuu yiri Jenaraal
Cabdullaahi Cali Caanood
Wuxuu intaasi ku daray Afhayeenka Wasaaradda Gaashaandhiga Soomaaliya in tirada
boqolaalka ee Shabaab looga dilay dagaalkii ka dhacay Ceelhareeri ineysan wada
aheyn dhamaan dagaalamayaasha Shabaab oo ay ka qeyb ka ahayeen dhalinyaro lasoo
raafay, waa sida uu hadalka u dhigaye.
“Arrinta ka dhacday Ceelhareeri waxay muujineysa boqolka qof ka badan ee
dhintay ineysan wada aheyn Al-Shabaab” ayuu yiri Jenaraal Caanood.
Shalay ayay aheyd markii Wasaaradda Gaashaandhiga Soomaaliya ay shaacisay in
dagaalkii ka dhacay Ceelhareeri lagu dilay in ka badan 100 dagaalameyaal ka
tirsan Al-shabaab.
Dowladda Imaaraadka Carabta ayaa soo dhaweysay go’aankii Golaha Ammaanka ee
Qaramada Midoobay ee tirsigiisu ahaa 2657 ee ahaa in dib loo cusboonaysiiyo
howlgalka Qaramada Midoobay ee kaalmeynta Soomaaliya, isagoo carabka ku
adkeeyay in ay taageerayaan nabadda iyo xasiloonida Soomaaliya iyo in ay sii wadayaan
taageerada ay siinayaan shacabka Soomaaliyeed.
Lana Nusseibeh, oo ah Ergeyga Joogtada ah ee Imaaraadka Carabta u fadhiya
Qaramada Midoobay, ayaa ku celisay sida ay uga xun tahay Soomaaliya, kaddib
qaraxii argagixisanimo ee ka dhacay Muqdisho 29-kii October.
Golaha Ammaanka ayaa carrabka ku adkeeyay muhiimadda ay leedahay iskaashiga
u dhexeeya Qaramada Midoobay, Midowga Afrika, Urur Goboleedka IGAD iyo
Soomaaliya, marka laga soo tago saaxiibada kale.
Xubnaha Goluhu waxay ku booriyeen Dowladda Federaalka Soomaaliya in ay sii qoto
dheeraato wadashaqeynta iyo wada shaqeynta heer kasta,
isla markaana ay meelmariso Qorshaha Amniga Qaranka iyo Qorshaha kala
guurka, horumarinta dib u heshiisiin siyaasadeed, mid qaran iyo mid deegaan,
horumarna laga gaaro dhameystirka dastuurka iyo la dagaalanka Al-Shabaab. si
loo sugo nabadda iyo amniga guud ahaan dalka.
Golaha ammaanka ee Qaramada Midoobey ayaa fadhi gaar ah oo ay yeesheen
waxaa ay kaga hadleen muddo kordhinta Xafiiska Qaramada Midoobey ee Soomaaliya
UNSOM.
15-ka xubnood ee golaha ammaanka ee Qaramada Midoobey ayaa Cod aqlabiyad ku
ansixiyay in hal sano oo kale loogu daro Xafiiska Qaramada Midoobey ee
Soomaaliya, waxaana muddo xileedkooda ay sii wadi doonaan illaa 31-ka Bisha
Agoosto 2021.
“Qoraarka tirsigiisu yahay 2540 oo ay Golaha Ammaanka ee QM wada aqbaleen
waxa uu ka codsanayaa Howlgalka UNSOM inay sii wadaan, siina xoojiyaan
joogitaankooda gudaha Soomaaliya iyo dhammaan Dowlad gobaleedyada xubnaha ka ah
Fedeeralka Soomaaliya” ayaa lagu yiri qoraal kasoo baxay Golaha Ammaanka.
Xafiiska Qaramada Midoobay ee Soomaaliya ayaa waxaa looga mahadceliyay
taageerada ay siiyaan Dowladda Federaalka Soomaaliya ee ku aaddan arrimaha
doorashooyinka oo la filayo in dalka ay ka dhacaan dhammaadka Sanadkaan
2020/2021.
Shirka Golaha Wadatashiga Qaran ee Soomaaliya ayaa la soo gaba gabeeyay, kaasoo
uu shir guddoominayay Madaxweyne Xasan Sheekh Maxamuud, iyadoo ay goob joog ka
ahaayeen madaxda dowladda Federaalka, Ra’iisul Wasaaraha, ku xigeenkiisa iyo
Duqa Muqdisho. caasimadda Muqdisho.
Shirkii ka socday magaalada Muqdisho intii u dhaxeysay 27-kii ilaa 31-kii
October ayaa laga soo saaray war murtiyeed ka kooban dhowr qodob iyo talooyin,
waxaana ugu waaweynaa.
Tacsi loo dirayo dhammaan shacabka Soomaaliyeed iyo eheladii iyo qaraabadii
ay ka geeriyoodeen dadkii ku shahiiday qaraxyadii ugu dambeeyay ee ka dhacay
dalka, gaar ahaan weerarkii ugu dambeeyay ee ka dhacay Isgoyska Soobi ee
magaalada Muqdisho 29-kii October.
Isagoo ammaanay guulihii is-daba-joogga ahaa ee ay gaareen ciidamada
qalabka sida iyo kacdoonkii kacaanka ee lagu ciribtirayay malleeshiyaadka
dhaqdhaqaaqa dhalinyarada “Khawaarij”.
Isagoo ammaanay gargaarka bini'aadantinimo iyo gargaarka ay u fidiyeen
dadka ay abaaruhu saameeyeen ee dowladda federaalka iyo dowlad goboleedyada,
shacabka Soomaaliyeed iyo beesha caalamka.
Isagoo ammaanay xasiloonida siyaasadeed, wada-noolaanshaha iyo
dimuqraadiyadda uu ku naaloonayo maamulka Somaliland, isagoo ugu baaqay madaxda
iyo shacabka inay ilaaliyaan xasilloonida iyo nabadda.
Waxaan ku ammaanay ganacsatada Soomaaliyeed iyo dawladda Puntland
hirgelinta mashruuca dekedda Garoowe oo noqday mid ku dayasho mudan.
In la bogaadiyo dadaallada Dowladda Puntland ay ugu jirto horumarinta
hannaanka dimoqraadiyadda iyo qabashada doorashooyin xor ah oo ay ka qayb
qaadanayaan shacabka deegaanka.
In la bogaadiyo dadaalka Dowladda Federaalka Soomaaliya ee ku aaddan
xoojinta xiriirka saaxiibada caalamka.
War murtiyeedka ayaa lagu xaqiijiyay in shirka la isku afgartay qodobadan.
Xaqiijinta amniga iyo la dagaalanka argagixisada.
Howlgalladan ciidanku waxa ay la socdaan istaraatiijiyadda qaran ee lagula
dagaallamayo maleeshiyaadka argagixisada iyo isku xirka dadaallada kala duwan
ee la xiriira.
Dhaqangelinta Heshiiskii Amniga Qaranka ee la saxiixay April 2017, waxaana
arrimaha farsamada ka shaqeyn doona guddi farsamo.
Dhiirigelinta dardar gelinta qorshaha kala guurka ah ee ciidamada qaranka
Soomaaliyeed ay si buuxda mas’uuliyadda amniga ugala wareegayaan ciidamada
ATMIS-ka.
Baahida degdega ah ee lagu maareeyo oo wax looga qabto saamaynta isbeddelka
cimilada iyo in la dhiso kaabayaasha u adkaysta masiibada.
In mudnaan gaar ah la siiyo gorgortanka siyaasadeed ee lagama maarmaanka u
ah dhameystirka dib u eegista dastuurka KMG ah iyo dhameystirka xubnaha ka
harsan dib u eegista dastuurka.
In dalka laga hirgeliyo nidaamka xisbiyada badan iyadoo dib u eegis lagu
sameeyo xeerarka xisbiyada iyo doorashooyinka.
In dalka oo dhan laga qabto doorashooyin xor ah oo daah-furan oo ku
salaysan codbixiyeyaal is-diiwaangeliyay iyo xisbiyo u tartamaya golayaasha
heerar kala duwan.
In laba jeer dalka lagu qabto doorasho, midda koowaad ee heer federaal, iyo
tan labaad ee dowlad goboleedyada xubnaha ka ah federaalka.
.jpeg)
