Madaxweynaha Jamhuuriyada Federaalka Soomaaliya Mudane Xasan SheekhMaxamuud oo khadka taleefanka kula xiriiray Madaxweynaha la doortay ee dalka
Kenya Mudane William Samoei Ruto ayaa ugu hambalyeeyey isaga iyo Ku-Xigeenkiisa
Mudane Rigathi Gachagua, guusha ay ka gaareen doorashooyinka dalkaas.
Madaxweynaha ayaa ku ammaanay shacabka Kenya, xisbiyada dalkaas, hay’adaha
amniga iyo madaxda tartantayba, sida nabadda ah ee ay doorashooyinkoodu u
qabsoomeen, taas oo tusaale u noqonaysa hannaanka dimuqraadiyadeed ee dalalka
Gobolka.
Dhankiisa, Madaxweyne William Ruto ayaa uga mahadceliyey Madaxweyne Xasan
Sheekh hambalyada iyo bogaadinta guusha doorasho ee xisbigiisa, waxa uuna
tilmaamay ixtiraamka iyo qaddarinta ay shacabka iyo dowladda Kenya u hayaan
walaalahooda Soomaaliya.
Labada Madaxweyne ayaa isla qaatay adkeynta xiriirka soo-jireenka ah ee ka
dhaxeeya labada shacab ee walaalaha ah iyo iskaashiga labada dowladood ee
dhinacyada horumarka, xasilloonida Mandiqadda, kobaca dhaqaalaha iyo la
dagaallanka argagixisada.
Madaxweynaha Jamhuuriyadda Federaalka Soomaaliya ayaa u rajeeyay madaxda
cusub ee dalka Kenya in ay ku guuleystaan ka miro-dhalinta hiigsiga shacabkooda
ee dhanka horumarka, door muuqdana ay ka qaataan iskaashiga iyo
wax-wada-qabsiga heer Gobol.
Laacibka reer Masar ee Mohamed Salah, oo u ciyaara kooxda Liverpool, waxa uu
leeyahay nambar aad u khaas ah inta lagu guda jiro kulamada ay kooxdiisu la
ciyaarayso Crystal Palace ee ka tirsan horyaalka Ingiriiska.
Liverpool ayaa ku kulmi doonta Crystal Palace fiidnimada Isniinta, garoonka
Anfield, kulan ka tirsan wareegga labaad ee Premier League.
Bogga rasmiga ah ee xidhiidhka bulshada ee Twitter-ka ayaa lagu qoray, “Mohamed
Salah waxa uu ka qayb qaatay 11 gool 7-dii kulan ee ugu dambeeyay oo uu kaliya
ka horyimid Crystal Palace horyaalka Premier League”.
Reds ayaa raadineysa guusheedii ugu horeysay ee Premier League xilli
ciyaareedkan, ka dib markii ay barbaro 2-2 ah la galeen Fulham wareegii
koowaad.
Liverpool ayaa soo gali doonta kulanka maanta ee Crystal Palace, iyadoo ay ka
maqan yihiin adeegyada Ibrahim Konate, Keller, Diogo Jota, Alexander
Chamberlain, Curtis Jones iyo Thiago Alcantara.
Markab gargaar oo laga keenay dalka Imaaraadka Carabta ayaa kusoo xirtay
dekedda magaalada Muqdisho, si uu u gaarsiiyo 1,000 tan oo sahay cunto ah oo
loogu talagalay ku dhawaad 2.5 milyan oo qof oo ay saameeyeen abaaraha ka jira
dalka.
Madaxweynaha Imaaraadka Carabta Sheikh Mohamed bin Zayed Al-Nahyan ayaa
horay u amray bixinta 35 milyan oo dirham oo gargaar bini’aadanimo oo degdeg ah
in loo diro qoysaska ku barakacay abaaraha ka jira Soomaaliya.
Shixnaddan ayaa waxaa iska kaashaday, isla markaana iska kaashaday Hay’adda
Bisha Cas ee Imaaraatka Carabta, Hay’adda Samafalka iyo Samafalka ee Zayed bin
Sultan Al Nahyan iyo Hay’adda Khalifa bin Zayed Humanitarian Foundation, si ay
u daboolaan baahiyaha Walaalaha Soomaaliya, Caawinta dadka ay Abaaruhu
saameeyeen iyo in la yareeyo. heerka uu gaarsiisan yahay dhibaatada bani
aadamka.
Mas’uuliyiinta ay khuseyso ayaa bilaabay in ay gargaar u qeybiyaan dadka
iyo barakacayaasha ku nool deegaannadooda iyo xerooyinkooda
Imaaraadka ayaa sheegay inay ka go’an tahay in ay caawiyaan dalalka
saaxiibka ah iyo dadaallada ay ku horumarinayaan xiriirka laba geesoodka ah ee
ay la leeyihiin dowladda Soomaaliya, sida ay horay u sheegtay wakaaladda
wararka ee dalkaas.
Imaaraatka Carabta ayaa dadaal badan ugu jira sidii gargaar loo gaarsiin
lahaa gobollada Soomaaliya ee ay saameeyeen abaaraha ka dhashay roob la’aanta
saddex xilli oo xiriir ah.
Daneynta Imaaraadka ee xaaladda bini’aadantinimo ee dadka Soomaaliyeed waxa
ay ku soo beegantay qaab dhismeedka hoggaanka caqliga leh ee u hanqal taagaya
caawinta dhammaan dalalka walaalaha iyo saaxiibada ah iyo kor u qaadida
awooddooda si ay u wajahaan xasaradaha bini’aadantinimo iyo yaraynta
dhibaatooyinka ka dhalanaya.
Soomaaliya ayaa ka mid ah dalalka Geeska Afrika ee ay sida weyn u saameysay
abaarta, taasoo dhibaato xooggan ku haysa kumanaan qof oo ay abaartu saameysay.
Ra’iisul Wasaaraha Soomaaliya Xamzah Cabdi Beerri ayaa wareegto uu
soo saaray kaga mamnuucayo xubnaha Golaha Wasiirada in ay shaqada ka eryaan
shaqaalaha dowladda iyaga oo aan ansixin.
Go’aamadan ayaa waxa kamid ahaa in wasiirada cusub aysan xil magacaabis
sameyn ama aysan kala bedalin masuuliyiinta hey’adaha ay madaxda ka yihiin,
illaa inta ay waafajinayaan sharciga oo ay la tashi kala sameynayaan xafiiska
Ra’iisul Wasaaraha.
Afhayeenka ayaa sheegay in ujeedka laga leeyahay go’aankan uu yahay in la
ilaaliyo sharciga, xuquuqda shaqaalaha iyo u sinaanta shaqada, maadama lagu
guda-jiro xili kala guur ah oo wasaaradaha xukuumadda ay yeesheen masuuliyiin
cusub.
Inta badan Wasiirada ayaa durtaba marka ay xilka la wareegaan waxaa dhici
jirtay inay shaqada ka joojiyaan Mas’uuliyiinta wasaarada, sida Agaasimayaasha,
taasi oo ka dhalan jirtay habacsanaan shaqo iyo is qabqabsi hor leh.
Go’aanka Ra’iisul Wasaaraha ayaa u muuqda mid uu ku xakameynayo awoodaha
Wasiiradiisa inay isbedel si iskood ah iska sameeyaan, iyagoo aan la tashan.
Si kastaba, Amarkaan uu Ra’iisul Wasaaruhu dul dhigay masuuliyiinta
dowladda ee wasiirradu ay ugu horeeyaan wuxuu ku soo aadayaa, iyadoo maalmaan
ay xowli u socoto xil wareejinta wasiirradii hore, kuwo cusubna ay xafiisyada
la wareegayaan.
Ra’iisul Wasaare Xamza iyo Madaxweynaha dalka ayaa ku dadaalaya sidii ay
shacabka Soomaaliyeed u ilaalin lahaayeen xuquuqdooda, waxaana uu soo saaray
sharci dhigaya in qof muwaadin ah aan xilka laga qaadi karin isaga oo aan raali
ka ahayn si uu u difaaco shacabka Soomaaliyeed.
Madaxweynaha Jamhuuriyadda
Federaalka Soomaaliya Mudane Xasan Sheekh Maxamuud iyo wafdi uu hoggaaminayo oo
safar shaqo ku joogay muddo afar cisho ah dalka Uganda ayaa maanta dib ugu soo
laabtay caasimadda dalka ee Muqdisho.
Madaxweynaha ayaa inta uu ku
sugnaa dalka Uganda waxa uu kulan miro-dhal ah la qaatay dhiggiisa dalkaas
Mudane Yoweri Museveni, waxa ayna labada Madaxweyne si wadajir ah u shir
guddoomiyeen Madasha Iskaashiga dhaqaale ee Soomaaliya iyo Uganda oo ku saabsnayd
fududeynta maalgashiga, kobcinta wax-soosaarka, xaqiijinta is-dhaafsiga
ganacsiga iyo badeecadaha ee labada dowladdood.
Sidoo kale, wafdiga heer
wasiirro ee Madaxweynaha Jamhuuriyadda ku wehelinayey safarkan ayaa dhiggooda
dalkaas la saxiixday heshiisyo lagu dhaqan-gelinayo go’aannadii ka soo baxay
kulanka labada Madaxweyne iyo Madasha Dhaqaalaha Soomaaliya iyo Uganda, si loo
dardargeliyo qorsheyaasha hortebinta u leh labada dal ee shaqo abuurka
dhallinyarada, xoojinta fursadaha haweenka, dhiirri gelinta ganacsiga gaarka
loo leeyahay, warshadaha iyo hannaanka maaliyadeed.
Madaxweyne Xasan Sheekh
Maxamuud iyo Madaxweyne Yoweri Kaguta Museveni ayaa adkeeyey muhiimadda ay
leedahay xoojinta iskaashiga amniga labada dal iyo nabadda Gobol, si loogu
guuleysto dagaalka lagula jiro kooxaha argagixisada ah.
Madaxweynaha Jamhuuriyadda
Federaalka Soomaaliya Mudane Xasan Sheekh Maxamuud oo khudbad ka jeediyey
Madasha Iskaashiga dhaqaale ee Soomaaliya iyo Uganda ayaa ka warbixiyey
fursadaha iyo koboca dhaqaale ee labada dal ay ka faa’iidayaan hirgelinta
iskaashiyada ay wada gaareen iyo xaqiijinta is-dhaafsiga ganacsiga iyo
badeecadaha.
Madaxweynaha ayaa dul istaagay guulaha laga dhaxlay heshiiskii dhexmaray
Soomaaliya iyo Uganda sanadkii 2016-kii, oo horseeday in uu kobco isdhaafsiga
dhaqaale ee labada dal, fududeynta socdaalka iyo duulimaadyada tooska ah,
mataaneynta Jaamacadaha, iskaashiga xiriirka diblumaasiyadeed iyo amni, isagoo
uga mahadceliyey dowladda iyo shacabka Uganda marti-gelinta madashan.
Furitaanka Shirkan oo ay wadajir u guddoomiyeen Madaxweynaha Jamhuuriyadda
Federaalka Soomaaliya iyo Madaxweynaha dalka Uganda Mudane Yoweri Museveni,
ayaa ganacsatada labada dal waxa ay ka arrinsadeen sidii ay kor ugu qaadi
lahaayeen maalgashiga, kaabeyaasha dhaqaalaha, shaqo abuurka dhallinyarada,
xoojinta fursadaha haweenka, dhiirri gelinta ganacsiga gaarka loo leeyahay,
warshadaha iyo hannaanka maaliyadeed.
Inta lagu guda jiray Madasha Ganacsiga Soomaaliya iyo Uganda, Wasiirka
Ganacsiga Xukuumadda Federaalka Soomaaliya Mudane Jabriil Cabdirashiid ayaa
heshiis ku saabsan iskaashiga dhaqaale la saxiixday dhiggiisa dalka Uganda
Mudane Mwebesa Francis, halka Agaasimaha Wasaaradda Qorsheynta iyo Horumarinta
Dhaqaalaha Soomaaliya Mudane Asad Yusuf iyo dhiggiisa Uganda Mudane Rwakakamba
Morrison iyo Rugaha Ganacsi ee labada dal ay kala saxiixdeen heshiisyo kale oo
ku saabsan fududeynta ganacsiga iyo isweydaarsiga khibradaha.
Ugu danbeyntii, Labada Madaxweyne ayaa faray Wasiirrada Labada dal in ay
xaqiijiyaan dhaqan-gelinta heshiisyada iyo talooyinka ka soo baxa Madasha
Dhaqaalaha Soomaaliya iyo Uganda, sidoo kalena ay ku sameeyaan dib-u-eegis
joogta ah, si loogu kuurgalo horumarka laga gaaro hirgelintooda, loona sahamiyo
dhinacyo kale oo Labada dal ay iska kaashan karaan.
Furitaanka Madashan waxaa ku weheliyey Madaxweynaha Jamhuuriyadda
Federaalka Soomaaliya Mudane Xasan Sheekh Maxamuud Wasiirka Wasaaradda Arrimaha
Dibadda iyo Iskaashiga Caalamiga Mudane Abshir Cumar Huruse, Wasiirka
Wasaaradda Gaashaandhigga XFS Mudane Cabdulqaadir Maxamed Nuur, Wasiirka
Wasaaradda Ganacsiga, Warshadaha Mudane Jabriil Cabdirashiid, Xildhibaanno ka
tirsan Golaha Shacabka Baarlamaanka Federaalka Soomaaliya, Agaasimaha Guud ee
Madaxtooyada Qaranka Mudane Xuseen Sheekh Maxamuud iyo Danjiraha dalkeenna u
fadhiya Uganda Mudane Cali Maxamed Maxamuud.
.jpeg)
