Shariif Sheekh Axmed ayaa loo doortay Xildhibaan ka tirsan Golaha Shacabka

 

Madaxweynihii hore ee Soomaaliya Shariif Sheekh Axmed oo loo doortay Xildhibaan

 Shariif Sheekh Axmed oo horay u soo noqday Madaxweynihii KMG ahaa ee Soomaaliya ayaa maanta oo Axad ah loo doortay Xildhibaan ka tirsan Golaha Shacabka (Aqalka Hoose ee Labada Aqal ee Baarlamaanka Soomaaliya).

Axmed ayaa ku guuleystay tartan ka dhacay magaalada Jowhar ee xarunta dowlad goboleedka Hirshabeelle oo 90-km dhanka waqooyi kaga beegan magaalada Muqdisho.

Kursigan oo magaciisa lagu sheegay HOP 146, ayaa afartii sano ee la soo dhaafay waxaa hayay Wasiirka Amniga Gudaha C/llaahi Maxamed Nuur.

Shariif Abuukar Axmed Sabriye oo la tartamayay Axmed ayaa ka tanaasulay tartanka wax yar ka hor codeynta, waxa uu ku soo baxay si lama filaan ah.

Haddaba, dhammaan 101-kii ergo ee ay soo xuleen hoggaamiyeyaasha beelaha iyo hawl-wadeennada bulshada rayidka ah, waxay cod gacan taag ah ugu codeeyeen Axmed.

Axmed waxa uu ahaa madaxweyne ku meel gaar ah intii u dhaxaysay 2009 ilaa 2012.

Bishii Sebtembar 2012, Axmed wuxuu ku guuldarreystay tartankii madaxweynenimo ee uu ku guuleystay madaxweynihii isaga beddelay ee Xasan Sheekh Maxamuud.

Maxamuud iyo Axmed iyo sidoo kale Ex-Ra’iisul Wasaare Xasan Cali Khayre ayaa labaduba ka mid ah Isbaheysiga Mucaaradka ah ee Madaxweyne Farmaajo oo la filayo in ay ku loolamaan Madaxweynaha hadda talada haya ee Maxamed Cabdullaahi Farmaajo doorashada Madaxweynaha oo loo badinayo in la qabto bisha May ee soo socota.

Si kastaba ha ahaatee, lama sheegin xilliga ay dhacayso doorashada madaxweynaha oo ay si wadajir ah u fulin doonaan xubnaha Aqalka Hoose iyo Aqalka Sare.

Axmed oo hadal kooban jeediyay doorashada kaddib, ayaa uga mahadceliyay ergadii dooratay, isagoo ballan-qaaday inuu si cadaalad ah ugu adeegi doono deegaanka.